әрдоған: ғәрб әллиридә мусулманларни чәткә қеқиш адәткә айланди

җумһур рәис рәҗәп таййип әрдоған ғәрб әллиридә мусулманларни чәткә қеқиш, ислам дүшмәнлики вә ирқчилиқниң адәткә айланғанлиқини ейтти.

1535852
әрдоған: ғәрб әллиридә мусулманларни чәткә қеқиш адәткә айланди

түркийә авази радийоси хәвири: җумһур рәис әрдоған, америка мусулманлар җәмийитиниң 23 –  нөвәтлик йиллиқ қурултийиға видео конферанс васитиси арқилиқ қатнашти, һәмдә бу йәрдә қилған сөзидә, бу йил пәқәт «вухән вируси» ға қаришила әмәс, бу вирустин нәччә һәссә тез тарқалған «ислам дүшмәнлики» вирусиға қаршиму күрәш қилишқа мәҗбур болғанлиқлирини тәкитләп мундақ деди: «узун йиллар демократийәниң босуғуси дәп аталған әлләрдә мәдәнийәт характерлик ириқчилиқ, айримчилиқ, хуш пеилсизлик йошурғили болмайдиған сәвийәгә йәтти.»

ислам дүшмәнлики вә чәт әллик өчмәнликиниң, сийасәтни әсиргә еливалидиған, күндилик һайатни қийинлаштуридиған, дөләтләрниң сийасәтлириниң йөнилишини бәлгиләйдиған бир хил еқимға айланғанлиқини қәйт қилған әрдоған, көплигән әлләрдә етиқади, тили, исми йаки кийиниш тәрзи сәвәблик мусулманларниң чәткә қеқилишиниң адәткә айлинип қалғанлиқини әскәртиш билән бир вақитта, шивейтсийәдә қуран кәримниң көйдүрүлүши, норвегийәдә қуран кәримниң йиртилиши, фирансийәдә ахбарат әркинлики намидин пәйғәмбәр әләйһиссаламға һақарәт қилинған һәҗвий рәсимләрни сизишниң тәшвиқ қилинишиниң, мусулманларниң муқәддәс қиммәтлиригә қаритилған һуҗумлардин пәқәт бирқанчиси икәнликини тәкитләп мундақ деди: «идеологийә җәһәттин даеш йаки фәтһуллаһчи террорлуқ тәшкилатидин қилчә пәрқләнмәйдиған идеологийәлик әсәбийликниң барғансери әвҗ елип кетиватқанлиқини, һәтта дөләт башлиқи сәвийәсидә тәшвиқ қилинидиған дәриҗигә берип йәткәнликини көрүватимиз.»

инсанларниң муқәддәс қиммәт өлчәмлирини кәмситишниң әркинлик билән қилчә мунасивити йоқлуқини әскәрткән әрдоған, мундақ дәп көрсәтти: «қуран кәримни көйдүргәнләрни пәпилигәнләр, пәйғәмбәр әләйһиссаламға һақарәт қилишни тәшвиқ қилғанлар, җамәләргә қаритилған һуҗумларни көрмәскә салғанлар, буларниң һәммисини әркинлик намидин әмәс, әксичә ички дунйасини қаплап кәткән пашизмни йошуруш үчүн қиливатиду. диққәт қилиңлар, бизниң муқәддәс қиммәт өлчәмлиримизгә қаритилған һәр түрлүк һуҗумни пикир вә ахбарат әркинлики дейишиду, әмма өзлиригә қаритилған әң кичик тәнқидкиму сәвр - тақәт қилалмайду.»

җумһур рәис әрдоған, ислам вә инсанийәт дүшмәнлириниң бунчилик пәрвасизлишип кетишиниң әң чоң сәвәбиниң, мусулманларниң һорунлуқ вә ғәпләт патқиқиға петип кетиши икәнликини тәкитләп мундақ деди: «муқәддәс қиммәт өлчәмлиримизгә қаритилған һуҗумлар алдида охшимайдиған тәрәплиримизни бир чәткә қайрип қойуп, ислам дининиң ортақ қиммәт қаришини чөридигән һалда бирликтә һәрикәт қилиш, һәммимизниң муқәддәс бурчидур.  мусулман киши башқиларниң һәққини йемигинидәк, башқиларниң өз һәққигә, һоқуқиға, шан – шәрипигә қол созушиғиму қәтий йол қоймайду. кимдин кәлсә кәлсун, адаләтсизлик вә қанунсизлиқ алдида сүкүт қилиш, мусулман кишигә йарашмайду.»



مۇناسىۋەتلىك خەۋەرلەر