türkiye ezerbeyjanning kelbejer zepirini tebriklidi

türkiye awazi radiyosi xewiri: ezerbeyjan armiyesi uda 27 yildin buyan ishghal astida turuwatqan kelbejerge kirdi.

ezerbeyjan bilen erméniye otturisida imzalanghan kélishimge asasen, 10 – noyabir küni taghliq qarabaghdiki toqunushlargha xatime bérilgen, erméniye ezerbeyjan aldida yéngilgenlikini qobul qilghan, arqidinla, taghliq qarabaghda 7 rayondin chékinip chéqip kétishni qobul qilghanidi.

erméniyedin kelbejerni 15 – noyabir küni ötküzüp bérishi telep qilinghan bolsimu, lékin, rayonning jughrapiyelik shert – sharaitliri we cheklik qatnash imkaniyetliri sewebidin, bu muddet ériwanning telipige binaen, 25 – noyabirghiche uzartilghanidi.

ammiwi taratqular we rus xewer tor betliride élan qilinghan körünüshlerde, kelbejerning oxshimighan rayonlirida yashawatqan ermenlerning ayrilishtin burun, öy – makanlar, mektepler, dölet binaliri we del – derexlerge ot qoyuwetkenliki, bir qisim imaretlerni weyran qiliwetkenliki körülgenidi.

erméniye terepke bérilgen qoshumche muddetning tünügün kéche toshushi bilen teng, ezerbeyjan armiyesi kelbejerge kirdi.

bu ariliqta, türkiye dölet mudapie ministirliqi, ammiwi ortaqlishish tor bétidiki sehipiside, ezerbeyjanning kelbejer zepirini tebriklep bayanat élan qildi.

ministirliqning bayanatida, mundaq déyildi: «kelbejer aridin 27 yil ötkendin kéyin sahibliri bilen uchrashmaqta. shanliq ay yultuzluq bayriqimiz, emdilikte ezan sadaliri bilen birlikte kelbejerde lerzan lepildeydu.»