erdoghan: nishanimiz  ittipaqdashlirimiz bilen hemkarliqni yenimu kücheytish

türkiye awazi radiyosi xewiri: jumhur reis erdoghan, rehberlikidiki adalet we tereqqiyat partiyesining, kütahya, afyonqarahisar, batman we siirt wilayetlirining, 7 – nöwetlik qurultaylirigha, widéo konférans wasitisi arqiliq neq meydandin ishtirak qilip, sözligen nutiqida, muhim nishanliridin birining, ne dölet ichide, ne dölet sirtida, héchkim bilen jédel - majira qilish emeslikini, eksiche, dostliri we ittipaqdashliri bilen téximu küchlük hemkarliq ornitish ikenlikini tekitlep mundaq dédi: «bizning muhim nishanlirimizdin biri, dostlirimiz we ittipaqdashlirimiz bilen téximu küchlük hemkarliq ornitishtur. yawropa ittipaqining bizge ayrimchiliq qilmasliqi, dölitimizge qarita düshmenliklerde kozérgha aylinip qalmasliqidur. özimizni bashqa jaylarda emes, yawropada körüwatimiz, kélechikimizni yawropa bilen birlikte berpa qilishni tesewwur qiliwatimiz.»

türkiyening amérika qoshma ishtatliri bilen bolghan uzaq mezgillik we yéqin ittipaqdashliq munasiwetlirini janlandurushni ümid qilidighanliqini eskertken jumhur reis erdoghan,  mundaq dep körsetti: «rusiye we irangha oxshighan munasiwetlirining tarixi nahayiti uzungha sozulidighan döletlerni esla nezerdin saqit qiliwételmeymiz. islam dunyasi we türk dunyasi bilen bolghan munasiwetlirimiz intayin chongqurdur. héchkimning bu jughrapiye ichide türkiyege, pütünley yalghan – yawidaqlar bilen tehdit sélish hoquqi yoqtur.»

türkiyening héchqandaq bir dölet, teshkilat bilen, siyasiy we diplomatik yollar hem diyalog arqiliq hel qilalmaydighan mesilisi yoqluqini qeyt qilghan erdoghan, mundaq dédi: «héchqandaq bir shereplik dölet we teshkilatning, türkiye düshmenlikini hayat ghayisigha aylanduruwalghan lobilar we bir qisim teshkilatlarning qolidiki oyunchiqigha aylanduruwélishini qobul qilmaydighanliqigha ishinimiz.»

jumhur reis erdoghan, «wuxen wirusi» gha qarshi küresh toghriliqmu toxtilip, «wuxen wirusi» bilen yuqumlanghuchilar sani köpiyip ketkenliktin, yéngi tedbirlerni yolgha qoyushqa mejbur bolup qalghanliqlirini tekitlep mundaq dédi: «bu yéngi yuqum dolquni toxtighan haman, parlaq bir kélechek bolidu. qanuniy qurulmimizni mustehkemlep, iqtisadiy ul téshimizning asaslirini kücheytip, ishlepchiqirish we ishqa orunlashturushni yenimu yüksek sewiyege yetküzüsh arqiliq, <wuxen wirusi> basquchidin kéyin qaytidin shekillinidighan dunyada özimizge yaxshi bir orun hazirlash iradimiz qetiydur.»