türkiye bilen rusiye qarabaghda urush toxtitishni nazaret qilidu

türkiye awazi radiyosi xewiri: jumhur reislik uchur-alaqe idarisi jumhur reis rejep tayyip erdoghan bilen rusiye pirézidénti wladimir putinning téléfonda körüshkenliki toghrisida bayanat élan qildi.

bayanatqa asaslanghanda, erdoghan bilen putinning téléfon körüshüshiide, türkiye-rusiye munasiwetliri bilen taghliq qarabagh we süriyeni asas qilghan rayonning nöwettiki weziyiti muzakire qilinghan.

jumhur reis rejep tayyip erdoghan taghliq qarabagh mesiliside, uzun muddetlik hel qilish charisigha munasiwetlik toghra qedem tashlanghanliqini bildürdi.

türkiye bilen rusiye birlikte zor hessilerni qoshqan bu muhim purset ötüp ketmestin adil we uzun muddetlik tinchliq arqiliq rayonda muqimliqning ornitilishi üchün paydilinish kéreklikini eskertken jumhur reis rejep tayyip erdoghan, yétip kélingen nuqtida, eng muhim ishning erméniyening urush toxtitishqa we ortaq bayanatta tilgha élinghan wedilirige boysunushi ikenlikini tekitlidi.

u türkiyening erméniyening ishghalidin azad qilinghan zéminlarda ezerbeyjan teripidin békitilidighan yerde qurulidighan ortaq merkez arqiliq rusiye bilen urush toxtitish üchün közitish we nazaret qilish paaliyetliride bolidighanliqini, shunga bu mesilide rusiyege muhim mesuliyetning chüshidighanliqini bildürdi.

u erméniyening ishghali seweblik qarabaghdin chiqip kétishke mejbur bolghan ezerbeyjanliqlarning yurt-makanlirigha qaytishining we ezerbeyjan-nehchiwan arisida bir karidor échilishining ehmiyitini tekitlidi.

u taghliq qarabaghning rayonluq toqunush we kirizislarni hel qilishta, türkiye-rusiye hemkarliqi özining ehmiyitini namayan qilghanliqini bildürüp, oxshash bolghan hemkarliq rohining süriye kirizisi üchünmu jari qilidurulushi kéreklikini we bu yerdimu oxshash méxanizmni ornitalaydighanliqlirini tekitlidi.