atatürk wapat bolghanliqining 82 – yilliqi
bügün türkiye jumhuriyiti dölitining qurghuchisi, ghazi mustapa kamal atatürk wapat bolghinigha 82 yil bolghan kündur.
türkiye awazi radiyosi xewiri: «musteqilliq urushi (1919 – 1923 – yillar)» arqiliq anadoluni ishghaldin azad qilghan, arqidinla her sahede ishqa ashurghan inqilabiy paaliyetliri sayisida zamaniwi türkiyening ul tashlirini ornatqan ulugh rehber atatürkning xatirisi üchün؛ u buningdin 82 yil ilgiri alem ötken etigen saet 9 din 5 minut ötkende, türkiyening herqaysi jaylirida hörmette turuldi: barliq türkiye xelqi bir minutluq hörmette turdi.
ashu peytlerde, dölet erbabliri, ulugh rehber atatürk xatire sariyini ziyaret qildi.
jumhur reis rejep tayyip erdoghan we uning hemrahliqidiki heyet, atatürkning huzurida hörmette turdi.
erdoghan, atatürk xatire sariyining mexsus deptirige munularni yazdi:
«millitimizning mewjutluq we musteqilliq kürishini ghelibe bilen tajlandurghan we bizge musteqil we erkin döletni miras qaldurghan ghazi mustapa kamal atatürk we uning qehriman sepdashliri millitimiz teripidin iptixarliq tuyghusi ichide yad étilidu. biz shéhitlirimizning pidakarliqliri üstige qurulghan jumhuriyitimiz menggü yashnaydighan, kelgüsi ewladlargha téximu güllengen, küchlük we nopuzluq bir döletni miras qaldurush üchün dawamliq tirishimiz. rohingiz aman bolghay!».
kéyinche, atatürk xatire sariyi keng xelq ammisining ziyaritige échiwétildi. buningdin 82 yil burunqi derd – elemlerni xuddi bügünkidekla hés qiliwatqan minglarche kishi, atatürkning huzurigha seldek aqti.
atatürkning wapat bolghanliqining 82 – yilliqi memliketning herqaysi jaylirida we wkaletxanilardimu murasimlar arqiliq xatirilendi.
büyük rehber mustapa kamal atatürk axiretke seper qilghan istanbuldiki «dolmabahche sariyi» diki hujrisidimu murasim arqiliq xatirilendi. murasim yéqinlashqanda, 7 yashtin 70 yashqiche bolghan her xil yashtiki puqralar sarayning aldida uzun öchret hasil qildi. bezi puqralar atatürkning yatiqi we etrapigha aq we qizil gülchembirekler hem güllirini qoydi, bezi yashlar we balilar bolsa, ulugh rehberge bolghan séghinishliq hés – tuyghulirini ipadilep yazghan xatirilirini qaldurdi.
