izmir déngiz tewelikide 6.6 bal yer tewridi
türkiye tebiiy apet we jiddiy ishlargha taqabil turush idarisi izmir seferihisar nahiyesining déngiz tewelikide yer tewrigenlikini élan qildi.
türkiye awazi radiyosi xewiri: izmir seferihisar nahiyesining déngiz tewelikide 6.6 bal yer tewridi. türkiye tebiiy apet we jiddiy ishlargha taqabil turush idarisining intérnét sehipisidiki melumatlargha asaslanghanda, bügün (2020-yili 30-öktebir) 14 tin 51 minut ötkende ege déngizida, izmir seferihisar nahiyesining 17 kilométir yiraqliqtiki déngiz tewelikide, 16.54 kilométir chongqurluqta 6.6 bal yer tewrigen.
izmir waliysi köshger yer tewreshtin kéyin élan qilghan bayanatida: «bizge yetküzülgen ölüm-yétim hadisisi heqqide héchqandaq melumat yoq. kirizis merkizige kelgen qandaq melumat bolsa, uni uqturimiz» dédi.
izmirning bayrakli nahiyeside yer tewresh sewebidin örülüp chüshken bir binada izdesh-qutquzush xizmiti bashlandi.
bu qétimqi yer tewresh istanbuldimu hés qilindi.
istanbul waliysi eli yerlikaya twittérda bayanat élan qilip: «istanbulda hés qilinghan yer tewreshte héchqandaq shum xewer bildürülmidi. barliq puqralirimizgha we izmirgha sewr tileymiz» dédi.
bu qétimqi yer tewresh, edirne, kiriklareli we tekirtagh qatarliq jaylardimu hés qilindi. mesul rehberler trakyada yer tewresh sewebidin özlirige yetküzülgen ölüm-yétim xewerlirining yoqluqini qeyt qildi.
