29 – öktebir jumhuriyet bayrimi tentenilik tebriklenmekte

türkiye jumhuriyiti qurulghanliqining 97 – yilliqi memliketning herqaysi jaylirida, chet ellerdiki wakaletxanilarda we shimaliy qibris türk jumhuriyitide türlük murasimlar arqiliq tentenilik tebriklenmekte.

1518022
29 – öktebir jumhuriyet bayrimi tentenilik tebriklenmekte

türkiye awazi radiyosi xewiri:  paytext enqerediki tunji murasim atatürk xatire sariyida ishqa ashuruldi. jumhur reis rejep tayyip erdoghan we hemrahliqidiki heyet atatürk xatire sariyini ziyaret qildi, hemde bu yerdiki jumhuriyetning qurghuchisi ghazi mustapa kamal atatürkning meqberesige gülchembirek qoydi.

jumhur reis erdoghan, atatürk xatire sariyining mexsus deptirige munularni yazdi:

dölitimizning algha ilgirilishige tosqunluq qilish üchün dölet ichi – sirtidin kéliwatqan her xil shekildiki hujumlar, bizni tiz püktürüsh uyaqta tursun, eksiche, polattek küresh qilish iradimizni téximu kücheytmekte, pidakarliqimizni yenimu yükseldürmekte. mislisiz zeperler bilen tolup tashqan ötmüshimizdin jasaret élip, birlik we barawerlik hem qérindashliq rishtisi ichide ortaq kélechek we parlaq istiqbal menzilgahimizgha  qarap ghelibiséri algha ilgirileshni izchil dawamlashturimiz.»

murasimdin kéyin, atatürk xatire sariyi puqralarning ziyaritige échiwétildi.

atatürk xatire sariyidiki murasimdin kéyin, tebriklesh paaliyetliri jumhur reislik sariyida dawamlishidu. jumhur reis erdoghan, bu yerde 29 –öktebir tebriklirini qobul qilidu. erdoghanning bu alahide kün munasiwiti bilen «beshtepe sariyi» da «milliy küresh körgezmisi» ni échishi kütülmekte.

«beshtepe sariyi» diki bayram tentenisi «jumhuriyet bayrimi köriki» bilen dawamlishidu. türkiye büyük millet mejliside bashlinidighan murasim yürüshi, birinchi mejliste axirlishidu. yürüsh harpisida muzika etriti nomur orunlaydu.

29 – öktebir jumhuriyet bayrimini tebriklesh paaliyetliri munasiwiti bilen, paytext enqerediki bir qisim ana yollar taqilidu.

29 – öktebir jumhuriyet bayrimini tebriklesh paaliyetliri bu murasimlar bilenla cheklinip qalmaydu.

jumhur reislik sariyi uchur – alaqe ishliri idarisining uyushturushida, antalyadiki patara qedimki shehiride, jumhur reislik sariyi simfoniye orkéstirimu, enqere waqti chüshtin kéyin saet 7 din 23 minut ötkende «büyük jumhuriyet konsérti» béridu.

buningdin bashqa yene, aqdéngizda 97 ghewwas mexsus su asti yorutush mahariti körsitidu.



مۇناسىۋەتلىك خەۋەرلەر