türkiye bérlindiki jame axturushini eyiblidi

türkiye awazi radiyosi xewiri: türkiye tashqi ishlar ministirliqi teripidin bu heqte élan qilinghan bayanatta, bérlindiki «mewlana jamesi» de jamaet bamdat namizi üchün toplanghan esnada, gérmaniye saqchilirining maliye mesililirini tekshürüsh dairiside jameni axturghanliqi eskertilish bilen bir waqitta, jamening sheherdiki eng qedimki we merkiziy ibadetxanilardin biri ikenliki tekitlinip mundaq déyildi: «gérmaniye saqchilirining <mewlana jamesi> ni axturushini qattiq eyibleymiz. bu qebih heriket arqiliq ibadet orunlirining muqeddeslikige körsitilishke tégishlik sezgürlükke sel qaralghan. saqchilarning tekshürüshni bahane qilip, jamening ichide qonchluq betinkiliri bilen aylinishi we ibadetxanini meynet qiliwétishini qobul qilish esla mumkin emes. bu qebih heriketning pikir we ibadet erkinliki mesiliside bashqilargha wez – nesihette bolushni teshebbus qilidighan bir döletning paytextide otturigha chiqishi tolimu meniliktur.»

axturushning musulman jemiyetke qarshi izahat bérish mumkin bolmaydighan bir heriket ikenliki qeyt qilinghan bayanatta, yene mundaq déyildi: «bu axturush gérmaniyede sani 5 milyongha yéqinlashqan musulman jemiyet duch kéliwatqan gumaniy qarash, ayrimchiliq we tengsiz muamilining yéngi bir örnikidur. musulmanlar téximu köp chetke qéqilmastin we ayrimchiliqqa duch kelmestin burun, musulmanlarning gérmaniyening ayrilmas bir parchisi ikenlikini, bérlin dairiliri idrak qilishliri kérek.»