erdoghan yawropa rehberlirige mektup yollidi

türkiye awazi radiyosi xewiri: jumhur reis rejep tayyip erdoghan, yawropa ittipaqi organlirining rehberlirige we eza döletlerning lidérlirigha ayrim – ayrim halda mektup yollap, türkiyening sherqiy aqdéngiz mesilige tutuwatqan pozitsiyesi we nöwettiki mesililerni hel qilishning chariliri toghrisidiki tekliplirini otturigha qoydi.

jumhur reis erdoghan mektupida, «sherqiy aqdéngiz siyasitimizning ikki asasiy nishani bar. birinchisi, sherqiy aqdéngizdiki salahiyet rayonlirining xelqara qanun boyiche heqqaniy we adil shekilde chégralandurulushi we igilik hoquq dairimizning heq - hoquqlirining muhapizet qilinishidur. ikkinchi nishanimiz bolsa, qibris türklirining qibris arilining barawer shérikliri süpitide aralning hidrokarbun bayliqliridiki barawer heq we menpeetlirining kapalet astigha élinishidur. girétsiye bilen aldinqi shertsiz halette diyalog ötküzüshke teyyar ikenlikimizni yene bir qétim tekitleymen. bu dairide jiddiychilikni peskuygha chüshürüsh üchün nato bash katipi yéns stolténbérgning déngiz we hawa amillirini ayrish teshebbusinimu bashtin tartipla qollap kelgenlikimizni diqqitinglargha sunimen» dégen ibarilerge orun berdi.

erdoghan, grétsiye we jenubiy qibris rim dairiliridin bashqa yawropa ittipaqi ezalirigha yollighan mektupida, sherqiy aqdéngiz mesilisige adil we tinch usulda bir chare tépishning hemmeylenning ortaq mesuliyiti ikenlikini tekitlep, «buning üchün hemkarliq we söhbet qollap – quwwetlinishi lazim, nöwettiki krizisni éghirlashturidighan tedbir we qararlardin saqlinish kérek. bizning semimiy arzuyimiz, 18-mart kélishimning nöwettiki sharaitni nezerde tutqan halda yéngilinishi we türkiye – yawropa ittipaqi munasiwetlirining her jehettin ortaq menpeetlirimizni chöridigen halda qedemmuqedem algha siljitilishidur. buning yoli bolsa, qanunsiz köchmenlik, térrorizm, soda, énérgiye dégendek nurghun perqliq sahede munasiwetlirimizning ortaq menpeetlirimizge nisbeten muhim ehmiyetke ige ikenlikini tonup yétish musapisini bésip ötidighanliqigha ishinimen, bu meqsetke yétish üchün qimmetlik qollishinglarni namayan qilishinglarni ümid qilimen» dégenlerni qeyt qildi.