әрдоған әрменийәни тәнқид қилди

түркийә җумһур рәиси рәҗәп таййип әрдоған әрменийә ишғал қилған әзәрбәйҗан земинидин дәрһал чиқип кәткәндә, бу районниң тинчлиқ вә хатирҗәмликкә еришидиғанлиқини ейтти.

1498869
әрдоған әрменийәни тәнқид қилди

түркийә авази радийоси хәвири: рәҗәп таййип әрдоған истанбул долмабаһчә сарийидики ишханисида, «хәлқара шәрқий ақдеңиз қануни вә ақдеңиз илмий муһакимә йиғини» да сөз қилди.

у түнүгүн (2020-йили 27-сентәбир) әзәрбәйҗан земиниға һуҗум қилған әрменийәни йәнә бир қетим әйибләйдиғанлиқини билдүрүп: «түркийә барлиқ имканийити вә қабилийити билән, достлуқ вә қериндаш әзәрбәйҗанни пүтүн вуҗуди билән давамлиқ қоллайду. әрменийә ишғал қилған әзәрбәйҗан земинидин дәрһал чиқип кәткәндә, район тинчлиқ вә хатирҗәмликкә еришиду» деди.

у мундақ деди:

«райондики тағлиқ қарабағни ишғал қилиш билән башланған киризисни ахирлаштуридиған пәйт йетип кәлди. әрменийә ишғал қилған әзәрбәйҗан земинидин дәрһал чиқип кәткәндә, район тинчлиқ вә хатирҗәмликкә еришиду. башқа барлиқ зорлап теңишлар вә тәһдитләр, адаләтсиз һәмдә қанунсиз болупла қалмай, бәлки әрменийәни давамлиқ һәддидин ашуриду. райондики йеңи өзгиришләр, райондики нопузлуқ дөләтләргә әмәлийәткә уйғун вә адил һәл қилиш чарилирини ишқа селиш пурсити елип кәлди. биз бу пурсәттин әң йахши усулда пайдилинишини үмид қилимиз.»

җумһур рәис рәҗәп таййип әрдоған ​​минсик үч тәрәп дәп атилидиған америка, русийә вә фирансийәниң 30 йилдин буйан бу мәсилини һәл қилмиғанлиқини әскәртип: «бу мәсилини һәл қилмаслиқ үчүн қолидин кәлгинини қилған болуши мумкин. әмди болса, әқил өгитиду, бәзидә пат-пат тәһидитму салиду. бу тәһдит немә? түркийә бу йәрдиму , түркийә армийәси бу йәрдиму?  буни дегәнләр җәнубимизда. улар болупму сүрийәниң шималида миңларчә йүк аптомобилида қорал тошиғанлардур. буни дегәнләр сүрийәниң шималини айрип, у йәрдә һәрбий база қурғанлардур. буни дегәнләр бирләшмә қисим билән сүрийәдә асманға пичақ атқанлардур. әмди улар ‹бу йәрдә түркийә әскири барму? түркийә бу йәргә қорал тошуватамду› дәп кәпту. бу логикиға қараң, бу әқилгә қараң, қериндишимиз илһам әлийев худдий уларға һесаб беридиғандәк. демисиму 30 йилға йеқин вақиттин буйан у сизгә һесаб бәрди. ‹бу ишни һәл қилайли, әмди бәк узартивәтмәйли› деди. ишғал қилинған йәрләр кимниң земини? әзәрбәйҗанниң земини, буни һәммиңлар етирап қилисләр. тағлиқ қарабағни қобул қилисләр, бу йәрдики 1 милйондин артуқ киши йурт-маканидин йирақта, әзәрбәйҗанда йашайду. ишғалчилар у йәрдә. буниң һесабини һечким соримайду. әмди һесаб сораш вақти кәлди дегән әзәрбәйҗан ихтийарсиз һалда өзини өзи оператсийә қилишқа мәҗбур болди.»



مۇناسىۋەتلىك خەۋەرلەر