erdoghan bilen makron téléfonlashti

jumhur reis rejep tayyip erdoghan firansiye pirézidénti émmanuél makron bilen téléfonlashti.

1495624
erdoghan bilen makron téléfonlashti

türkiye awazi radiyosi xewiri: jumhur reislik mehkimisi uchur – alaqe ishliri idarisining bildürüshiche, makronning telipige asasen ötküzülgen téléfon söhbitide, türkiye -  firansiye we türkiye – yawropa ittipaqi munasiwetliri bilen sherqiy aqdéngiz mesilisi bashta bolup rayongha alaqidar özgirishler muzakire qilinghan.

jumhur reis erdoghan söhbet jeryanida, sherqiy aqdéngizdiki jiddiychilikning sewebining türkiye we shimaliy qibris türklirining rayondiki qanunluq heqlirining nezerdin saqit qilinishi ikenlikige isharet qilip, firansiyening, girétsiye we jenubiy qibris rim teripining sürkilishni ulghaytquchi dewa we qedemlirini qollishini chüshinelmigenlikini eskertti.

türkiyening héchkimning heqqi – hoquqida nezirining yoqluqini, biraq, özining heqlirinimu héchkimge tartquzup qoymaydighanliqini tekitligen erdoghan, her daimqigha oxshash hazirmu saqliniwatqan mesililerni hel qilish üchün diyalog ötküzüsh we hemkarliq ornitishni teshebbus qilidighanliqini otturigha qoydi.

jiddiychilikni peseytish üchün diplomatiyening pursetliridin paydilinish we sijil söhbetlishish musapisini yolgha qoyush kéreklikini tekitligen erdoghan, barliq mesililerni söhbetlishish arqiliq hel qilishni xalaydighanliqini bildürdi.

jumhur reis erdoghan, bu musapide firansiyedinmu soghuqqan we ijabiy pozitsiyede bolushini kütidighanliqini, türkiye bilen firansiye otturisidiki kéngishish we alaqe méxanizmining üzlüksiz heriketlinip turushining paydiliq ikenlikini otturigha qoydi.

erdoghan, yawropa ittipaqi bashliqlar yighinidin türkiye bilen berpachi dialog we  hemkarliqni ilgiri sürüshni teshebbus qilidighan bir qararning chiqishining rayon xaraktérlik mesililerni hel qilish nuqtisidin muhimliqini sözlirige ilawe qildi.



مۇناسىۋەتلىك خەۋەرلەر