türkiye malidiki herbiy özgirish toghrisida bayanat élan qildi

türkiye tünügün (2020-yili 18-awghust) afriqa döliti malida armiye ichidiki bir guruppa eskerning, hökümetni we parlaméntni tarqitiwétishke mejburlishini eyiblep bayanat élan qildi.

1475491
türkiye malidiki herbiy özgirish toghrisida bayanat élan qildi

türkiye awazi radiyosi xewiri: türkiye malida armiye ichidiki bir guruppa qozghighan herbiy özgirish netijiside, pirézidént ibrahim bowbajar kéyta (İbrahim Boubacar Keita) ning parlamént bilen hökümetni tarqitiwétishke we hoquqidin istépa bérishke mejburlinishidin chongqur endishe qiliwatqanliqini bildürdi.

türkiye tashqi ishlar ministirliqi malida yüz bergen herbiy özgirish toghrisida yazma bayanat élan qildi.

bayanatta, dost we qérindash dölet malida ichki tinchliq, bixeterlik we muqimliqni téz sürette qaytidin tesis qilish, pirézidént ibrahim bowbajar kéyta we bashqa tutup turuluwatqan yuqiri derijilik emeldarlarni derhal qoyup bérish we dölet ichide asasiy qanun tertipige baldurraq qaytip kélish toghrisidiki küchlük telep tekitlendi.

türkiyening b d t, afriqa ittipaqi we gherbiy afriqa döletliri iqtisadiy birleshmisi(ECOWAS)  ning bu meqsette körsitiwatqan tirishchanliqlirini qollaydighanliqi eskertilgen bayanatta: «türkiye qiyin bir mezgilni bashtin kechürüwatqan dost we qérindash dölet malini dawamliq qollaydu» déyildi.

tünügün etigen mali paytexti bamako etrapigha jaylashqan herbiy bazida heriketlinish bolghan we herbiy aptomobillar paytextke qarap ilgiriligen idi.

armiyening ikki guruppigha ayrilghanliqi, isyanchi eskerlerdin bashqa pirézidént kéytaning buyruqi bilen heriket qiliwatqanlarningmu barliqi qeyt qilinghan idi.

mali parlamént bashliqi mossa timbin (Moussa Timbine), iqtisad we pul-muamile ministiri abdolaye daffe (Abdoulaye Daffe) we tashqi ishlar ministiri tiybl dramé (Tieble Drame) ning görüge élinghanliqi bildürülgen idi.

shu küni chüshtin kéyin, bir guruppa esker teripidin görüge élinip herbiy bazigha keltürülgen pirézidént kéyta, dölet téléwiziyeside hoquqidin istépa bergenlikini, hökümet bilen parlaméntnimu tarqitiwetkenlikini élan qilghan idi.

mali öktichiliri 2020-yili may éyidin buyan kéytaning istépasini telep qilip namayish qilip kelmekte idi.

gherbiy afriqa döletliri iqtisadiy birleshmisi kéytani öktichiler bilen söhbet ötküzüshni teklip qilghan bolup, öktichiler teklipni ret qilghan idi.

öktichi siyasiy partiyeler we nurghun ijtimaiy teshkilatlardin teshkillengen «M5 RFP» munbiri, kéyta istépa bergiche namayishlirini dawamlashturidighanliqini jakarlighan idi.



مۇناسىۋەتلىك خەۋەرلەر