«биз ливийәниң һәрқандақ йеридә һәрбий һәл қилиш чарисини таллимаймиз»

җумһур рәислик сарийи байанатчиси ибраһим қалин түркийәниң ливийәниң һәрқандақ йеридә һәрбий һәл қилиш чарисини таллимайдиғанлиқини ейтти.

1474846
«биз ливийәниң һәрқандақ йеридә һәрбий һәл қилиш чарисини таллимаймиз»

түркийә авази радийоси хәвири: қалин, қатарниң «‹Al Jazeera› телевизийә қанили» ға бәргән байанатида, түркийәниң қатар вә башқа бир қисим дөләтләр билән бирликтә ливийәдики сийасий һәрикәтни қоллаш мәқситидә ливийәдә мәвҗут болуватқанлиқини, ливийәдә киризисниң сийасий йоллар арқилиқ һәл болушиға ишинидиғанлиқлирини әскәртиш билән бир вақитта, сиртә вә җуфрада уда бир йил бойичә әскәр топланғанлиқини, буниңдин  толиму әншә қиливатқанлиқлирини қәйт қилди. шуниң билән бир вақитта, бу әһвалниң тинчлиқ вә ливийәниң земин пүтүнлүки үчүн тәһдит шәкилләндүргәнликини, түркийәниң ливийәниң парчилинишиға мунасивәтлик рәсмий вә ғәйрий рәсмий пиланларға қарши икәнликини тәкитләп мундақ деди: «түркийә ливийәниң һәрқандақ йеридә һәрбий һәл қилиш чарисини таллимайду. у йәрдә һәрбий күрәшниң давамлишишини халимайдиғанлиқимизни һәмишә оттуриға қойуп келиватимиз. җүмлидин, биз ливийәдә һәрқандақ бир дөләт билән ихтилаплишип қелишни халимаймиз. мисир ливийәниң қошниси болғанлиқи үчүн, мисирниң у йәрдә иҗабий рол ойнийалайдиғанлиқиға ишинимиз. әслидә бизни әндишиләндүрүватқини, русийәниң у йәрдә вагнерға охшиған йалланма әскәрләрни турғузуши вә әрәб бирләшмә хәлипиликиниң ливийәниң шәрқидики қанунсиз қораллиқ күчләрниң рәһбири хәлифә һәфтәргә йардәм бериш үчүн судан, нигер вә чад қатарлиқ дөләтләрдин йалланма әскәрләрни кәлтүрүшидур.»

сиртә вә җуфраниң қорал – йарағлардин халий қилиниш тәклипигә, тоқунушларниң тохтитилиши үчүн нәзәргә елишқа тегишлик йахши пикир дәп қарайдиғанлиқлирини әскәрткән қалин, мундақ дәп көрсәтти: «ливийә һөкүмити сиртә вә җуфраниң қорал – йарағлардин халий қилинишни қобул қилғили болидиған шәртләр астида мақуллиса, бизму уларни қоллаймиз. бирақ бу адил вә очуқ – ашкара һалда ишқа ашурулуши керәк. бу шәһәрләр киризисни сийасий йоллар арқилиқ һәл қилиш чариси үчүн бир пәнҗирә болуп қелиши мумкин.»

түркийәниң шәрқий ақдеңизда сүркилишни халимайдиғанлиқини әскәрткән қалин, ақдеңизға қирғақдаш болған дөләтләрниң районниң тинчлиқи вә параванлиқиға һәссә қошалайдиғанлиқини, һәмдә тәбиий байлиқлирини һәққанийәт асасида ортақлишалайдиғанлиқини тәкитлиди.



مۇناسىۋەتلىك خەۋەرلەر