türkiye abu dabi bilen bolghan diplomatiye munasiwitini tonglitishi mumkin
türkiye jumhur reisi rejep tayyip erdoghan türkiyening abu dabi hökümiti bilen diplomatik munasiwetlerni tonglitishqa oxshash qedemlerni tashlishi mumkinlikidin bésharet berdi.
türkiye awazi radiyosi xewiri: jumhur reis rejep tayyip erdoghan bügün (2020-yili 14-awghust) istanbulda jüme namizidin kéyin, muxbirlarning ziyaritini qobul qilip küntertiptiki mesililer üstide toxtaldi.
u ereb birleshme xelipilikining isirailiye bilen bolghan munasiwetlirini normallashturush kélishimi heqqide mundaq dédi:
«isirailiye bilen, misir yaki girétsiye otturisidiki hemkarliq, pelestinge qarita köz yumup ötküzüwétidighan mesile emes. abu dabi hökümiti bilen, bolupmu diplomatik munasiwetlerni tonglitish yaki bash elchimizni chaqirishqa oxshash qedemlerni tashlishimiz mumkin. pelestin xelqini qollaymiz. pelestinni hergiz tashlap bermiduq, hem bermeymiz» dédi.
tashqi ishlar ministiri mewlüt chawushoghlu shiwéytsariye tashqi ishlar ministiri ignaziyo kasis (Ignazio Cassis) bilen körüshkendin kéyin, qoshma axbarat élan qilish yighini ötküzdi.
mewlüt chawushoghlu isirailiye-ereb birleshme xelipiliki kélishimige bolghan naraziliqini bildürüp: «bu kélishim pelestin dewasigha xizmet qilmaydu. pelestinni ajizlitish üchün oyun oynawatidu. ereb birleshme xelipiliki rayonning muqimsizliqi üchün tirishiwatidu, özining menpeetliri üchün pelestin dewasigha xiyanet qiliwatidu» dédi.
