әрдоған: бүйүк вә күчлүк түркийәни бина қилишта ахирқи бурулушқа қарап илгириләватимиз

түркийә авази радийоси хәвири: җумһур рәис рәҗәп таййип әрдоған тәхминән аридин үч ай өткәндин кейин тунҗи қетим йүз туранә өткүзүлгән кабент йиғинини ахирлаштуруп муһим байанатларни елан қилди.

у вухән вируси (Kovid-19) пүтүнләй йилтизидин йоқитилмиғичә, нормал һайатниң маска, иҗтимаий мусапә вә тазилиқ пиринсиплири рамкисида болуши керәкликини әскәртип: «йеңи нормал дәватқан вә хели бир мәзгилгичә давамлишидиған йеңи турмуш тәртипидин ибарәт әмәлийәткә өзимизни көндүрүшимиз лазим» деди.

у вабани давалашта үнүми йуқири болуватқан «фавипиравир» (Favipiravir) намлиқ дорини, түркийә алимлириниң түбитак (түркийә билим вә технологийәлик тәтқиқат идариси) ниң күнлүки астида мувәппәқийәтлик йасиғанлиқини вә дориниң давалашта ишлитиливатқанлиқини билдүрди.

у әмдиликтә 65 йаштин йуқири кишиләрниң һәр күни 10:00 дин 20:00 гичә болған арилиқта, 18 йаштин кичикләрниң ата-аниларниң һәмраһлиқида һәр күни сиртқа чиқса болидиғанлиқини әскәртип, йеңи нормал һайатқа мунасивәтлик мәдәнийәт-сәнәт, хизмәт, иҗтимаий турмуш қатарлиқ саһәләрдә йолға қойулған бир қатар бәлгилимиләрни елан қилди. у мундақ деди:

«хәлқимдин һәм йеңи мәзгилниң қаидәлиригә риайә қилип, һәм өзиниң ишиға вә турмушиға диққитини мәркәзләштүрүп, бу мусапини қоллишини үмид қилимән.»

у җумһурийитимиз қурулғанлиқиниң 100-йили болған 2023-йиллиқ нишанға йетишкә аз қалған мәзгилдә туруватқанлиқлирини, түркийәниң вабадин кейин, ишләпчиқириш, сода вә қатнаш-тирансипорт артуқчилиқлири билән, дунйа иқтисадидики орнини техиму күчләндүридиғанлиқини билдүрди.

у: «бүйүк вә күчлүк түркийәни бина қилишта ахирқи бурулуш мәзгилигә қәдәм қойулди. һәр қандақ ваба вә тәһдит, дөләт вә хәлқ болуш сүпитимиз билән иттипақлиқимиздин, баравәрликимиздин, қериндашлиқимиздин, һәмкарлиқлиримиздин чоң әмәс, дегән ишәнч билән йолимизни давамлаштуримиз» деди.

у түркийәниң 40 йилға йеқинлашқан бөлгүнчи террорлуқ тәшкилатиға қарши күришидә тарихтики алтун дәврини баштин кәчүрүватқанлиқини тәкитлиди.

у сүрийәниң идлиб районида қайта уруш вәзийитиниң пәйда қилинишиға көз йумулмайдиғанлиқини, ливийәдә һәрбий исйанчиларни, империйалистларни әмәс, бәлки хәлқни қоллашни давамлаштуридиғанлиқлирини қәйт қилди.