88 dölet türkiyedin tibbiy yardem telep qilghan

türkiye awazi radiyosi xewiri: sehiye ministiri fahrettin koja dunya sehiye teshkilatining yawropa rayoni diréktori hans klug (Hans Kluge) bilen widéo arqiliq körüshti.

körüshüshte, wuxen wirusi mesilisi muzakire qilindi. türkiye bilen dunya sehiye teshkilati yawropa rayoni otturisida 2020- we 2021 yillirini öz ichige alidighan shekilde ikki yilliq hemkarliq kélishimi imzalandi.

körüshüshke, dunya sehiye teshkilatigha wakaliten türkiye ishxanisining mudiri pawél ursu (Pavel Ursu) mu qatnashti.

 hans klug wuxen wirusining yéngi merkizining shimaliy amérika bolghanliqini bildürüp, sehiye xadimlirining tégishlik shekilde qoghdinishi üchün maska we süniy nepeslendürgüch qatarliq tibbiy lazimetliklerning intayin muhim ikenlikini tekitlidi.

u bu mesilide italiye we ispaniye qatarliq döletlerge yardem qilghan türkiyege teshekkür éytti we: «uchur almashturush mesiliside, bolupmu ölüm nisbiti melumatlirini éléktironluq munberlerde élan qilghanliqinglarni teqdirleymen» dédi.

u wirusqa qarshi turushta, pütün küchni seperwerlikke keltürüsh üchün bésilghan qedemler we namayan qilinghan rehberlik üchün jumhur reis rejep tayyip erdoghannimu tebriklidi.

türkiye sehiye ministiri fahrettin koja wirus otturigha chiqqan deslepki künlerdin bashlapla muhim tedbirlerni yolgha qoyup, türkiyege tarqilish süritini kéchiktürgenlikilirini qeyt qildi.

u: «dunyada bashlanghandin 90 kün kéyin, yeni 2020-yili 10-mart türkiyede tunji weqe körüldi. yawropada wirus tarqalghan axirqi dölet bolduq» dédi.

u türkiye sehiye sistémisining küchlük we jiddiy qutquzush bölümlirining tolush nisbitining %62 ikenlikini, qoghdinish esliheliri nuqtisidin éytqandimu türkiyening özining özige yétidighan we yawropa rayonigha sélishturghanda nahayiti yaxshi ehwalda ikenlikini tekitlidi.

u tibbiy eslihe toghrisida chet ellerdin nurghun telep kelgenlikini bildürüp: «30 gha yéqin döletning éhtiyajini qamdash üchün tirishtuq. bu musapide 88 döletning tibbiy eslihe telep qilghanliqini éytishni xalaymen» dédi.