erdoghan bilim kéngishi ezalirigha teshekkür éytti

türkiye awazi radiyosi xewiri: jumhur reis rejep tayyip erdoghan sehiye ministiri fahrettin koja bilen maarip ministiri ziya selchuktin melumat aldi. u wuxen wirusigha qarshi küresh qiliwatqan bilim kéngishi ezalirigha teshekkür éytti.

u türkiyening wirusqa qarshi tedbirlirini waqtida yolgha qoyushida we wirusning tarqilishining töwen sewiyede bolushida, bilim kéngishining xizmet hemde tewsiyelirining muhim rol oynighanliqini bildürdi.

u: «xelqimiz bu wirusqa qarshi turush ramkisida yolgha qoyulghan tedbirlerge angliq muamile qilip, yuqiri sewiyede riaye qildi. jemiyette tehditning éghirliqini chüshenmigenler bolsimu, emma omumiy jehettin xelqimizning angliqliqidin xushalmiz. hazirghiche mesilining hayatliqqa munasiwetlik ikenlikini bilelmigenler bar bolsimu, silerning tewsiye we tirishchanliqinglar bilen eng qisqa waqit ichide toghrini köridighanliqigha ishinimen» dédi.

u bilim kéngishi we bilim ademlirining bu musapide namayan qilghan iradisi, qetiy we qayil qilarliq muamilisining bashqa sahelergimu ülge bolidighanliqini eskertip: «dölitimizdiki weqe we ölüm nisbiti, barghanséri aziyishqa qarap yüzliniwatqanliqini körsitidu. aprél éyining deslepki künlirige qaritilghan perezler her küni élan qilghan sanlar bilen barghanséri chékinmekte. bu musapide sehiye xadimlirimizning pédakarliqi her türlük teqdirleshning üstide turidu. silerning naminglarda barliq sehiye xizmetchilirimizni yene bir qétim tebrikleymen» dédi.

u yolgha qoyulghan tebirler arqiliq xelq saqliqidin bashqa éhtiyajlirini qamdashtin turmushighiche barliq mesililerning hel qilinishi üchün tirishchanliq körsitilgenlikini bildürdi.

u: «türkiye jumhuriyiti döliti pütün imkaniyetliri bilen 83 milyon puqrasining yénida. chet ellerde yashawatqan puqralirimiz bilen elchixanilirimiz we konsulxanilirimizning wastisi bilen izchil alaqe halitide turuwatimiz. dölitige qaytishni telep qilghan puqralirimizgha, oqughuchilirimizgha aldin ehmiyet bérish arqiliq mewjut shert-sharaitlar dairiside zörür imkaniyetlerni yaritiwatimiz» dédi.

yighingha, xezine we maliye ministiri berat albayrak, jumhur reislik uchur-alaqe idarisi ministiri fahrettin altun we jumhur reislik sariyi bayanatchisi ibrahim kalin qatnashti.