әрдоған билим кеңиши әзалириға тәшәккүр ейтти

түркийә җумһур рәиси рәҗәп таййип әрдоған түнүгүн (2020-йили 26-март) корона вируси (вухән вируси) билим кеңиши йиғиниға, видео конферанс усулида қатнашти.

1385621
әрдоған билим кеңиши әзалириға тәшәккүр ейтти

түркийә авази радийоси хәвири: җумһур рәис рәҗәп таййип әрдоған сәһийә министири фаһрәттин коҗа билән маарип министири зийа сәлчуктин мәлумат алди. у вухән вирусиға қарши күрәш қиливатқан билим кеңиши әзалириға тәшәккүр ейтти.

у түркийәниң вирусқа қарши тәдбирлирини вақтида йолға қойушида вә вирусниң тарқилишиниң төвән сәвийәдә болушида, билим кеңишиниң хизмәт һәмдә тәвсийәлириниң муһим рол ойниғанлиқини билдүрди.

у: «хәлқимиз бу вирусқа қарши туруш рамкисида йолға қойулған тәдбирләргә аңлиқ муамилә қилип, йуқири сәвийәдә риайә қилди. җәмийәттә тәһдитниң еғирлиқини чүшәнмигәнләр болсиму, әмма омумий җәһәттин хәлқимизниң аңлиқлиқидин хушалмиз. һазирғичә мәсилиниң һайатлиққа мунасивәтлик икәнликини биләлмигәнләр бар болсиму, силәрниң тәвсийә вә тиришчанлиқиңлар билән әң қисқа вақит ичидә тоғрини көридиғанлиқиға ишинимән» деди.

у билим кеңиши вә билим адәмлириниң бу мусапидә намайан қилған ирадиси, қәтий вә қайил қиларлиқ муамилисиниң башқа саһәләргиму үлгә болидиғанлиқини әскәртип: «дөлитимиздики вәқә вә өлүм нисбити, барғансери азийишқа қарап йүзлиниватқанлиқини көрситиду. апрел ейиниң дәсләпки күнлиригә қаритилған пәрәзләр һәр күни елан қилған санлар билән барғансери чекинмәктә. бу мусапидә сәһийә хадимлиримизниң педакарлиқи һәр түрлүк тәқдирләшниң үстидә туриду. силәрниң намиңларда барлиқ сәһийә хизмәтчилиримизни йәнә бир қетим тәбрикләймән» деди.

у йолға қойулған тәбирләр арқилиқ хәлқ сақлиқидин башқа еһтийаҗлирини қамдаштин турмушиғичә барлиқ мәсилиләрниң һәл қилиниши үчүн тиришчанлиқ көрситилгәнликини билдүрди.

у: «түркийә җумһурийити дөлити пүтүн имканийәтлири билән 83 милйон пуқрасиниң йенида. чәт әлләрдә йашаватқан пуқралиримиз билән әлчиханилиримиз вә консулханилиримизниң вастиси билән изчил алақә һалитидә туруватимиз. дөлитигә қайтишни тәләп қилған пуқралиримизға, оқуғучилиримизға алдин әһмийәт бериш арқилиқ мәвҗут шәрт-шараитлар даирисидә зөрүр имканийәтләрни йаритиватимиз» деди.

йиғинға, хәзинә вә малийә министири бәрат албайрак, җумһур рәислик учур-алақә идариси министири фаһрәттин алтун вә җумһур рәислик сарийи байанатчиси ибраһим калин қатнашти.  



مۇناسىۋەتلىك خەۋەرلەر