erdoghan kélishimning muhim netije ikenlikini bildürdi

türkiye jumhur reisi rejep tayyip erdoghan türkiye bilen rusiye otturisida hasil qilinghan kélishim toghrisida toxtilip, süriyening idlib shehiridiki urush toxtitishning muhim netijilerni qolgha keltürgenlikini bildürdi.

1373533
erdoghan kélishimning muhim netije ikenlikini bildürdi

türkiye awazi radiyosi xewiri: türkiye jumhur reisi rejep tayyip erdoghan tünügün (2020-yili 5-mart) rusiye ziyaritini axirlashturup qaytish sepiride muxbirlarning soallirigha jawab berdi. u idlibta urush toxtitish toghrisida toxtilip mundaq dédi:

«beshshar esed hakimiyitining kélishimge xilapliq qilishi we hujum qilish éhtimaligha qarshi her qachan teyyarliq halitide turimiz. bir yerde mesile körülse derhal heriketke ötimiz.»

u türkiyening meqsitining süriyede b d t xewpsizlik kéngishining 2254-nomurluq qararidiki siyasiy musapini küchke ige qilish we süriye ichki urushini axirlashturush ikenlikini eskertip, moskwagha barghandimu meqsetning urush toxtitishni kapaletke ige qilish bolghanliqini we buninggha muweppeq bolghanliqlirini qeyt qildi.

u idlibtiki türkiyening közitish nuqtiliri toghrisida héchqandaq özgirish bolmighanliqini eskertti.

u idlibning rusiye bilen türkiye otturisidiki weqe emeslikini tekitlep: «u yerde bizning qarshimizda rusiye yoq, belki beshshar esed hakimiyiti bar» dédi.

jumhur reis rejep tayyip erdoghan türkiyedin yawropagha kétishke tirishiwatqan musapirlar toghrisida toxtilip: «bu waqitta girétsiye bilen talash-tartish qilidighan waqtimiz yoq, u ish axirlashti. musapirlarning kételigenliri kétidu, ularni mejburiy dölitimizdin heydimeymiz» dédi.

u gherbning musapirlar mesiliside ikki yüzlimichilik qilghanliqini eskertip: «girétsiyege derhal 700 milyon yawro wede qildi. bizge gérmaniye bash ministiri angéla mérkél 700 milyon emes 25 milyon yawroni tilgha aldi, emma uningdinmu hazirghiche sada yoq» dédi.

u türkiyening rusiyedin sétiwalghan «400-S» hawa mudapie sistémisining pütünley tapshuruwélinghanliqini we aprél éyidin bashlap paal heriketke kirishtürülidighanliqini bildürdi.

u rusiye pirézidénti wladimir putin bilen liwiye mesilisinimu muzakire qilghanliqlirini we u yerdiki ehwalningmu idlibqa oxshash shekilde netijige ige bolushi ümidi ichide ikenliklirini qeyt qildi.



مۇناسىۋەتلىك خەۋەرلەر