түркийә «вухән вируси» ға қарита күчлүк тәдбирләрни йолға қойди

2019 – йили декабирда хитайниң вухән шәһиридә оттуриға чиққан йеңи типтики таҗсиман вирусқа қарита тегишлик тәдбирләрни йолға қойған түркийә, бу вирус көрүлүп қалған тәқдирдә ташлинидиған қәдәмләрниң пиланлирини түзүп чиқти.

1366621
түркийә «вухән вируси» ға қарита күчлүк тәдбирләрни йолға қойди

түркийә авази радийоси хәвири: түркийә, вухән вирусиниң хитайдин кейин башқа дөләтләрдиму баш көтүрүшкә башлиши билән тәң, күчлүк сәһийә тармақлири сайисида тунҗи болуп һәрикәткә өткән дөләтләрдин бири болди؛ сәһийә министирлиқи тәтқиқат оргини «2019-nCov кесәллики қолланмиси» тәййарлап, 14 – йанварда нәшр қилди.

вирусниң оттуриға чиқиши билән 21 – йанварда чегра вә деңиз қирғиқи сәһийә ишлири мудирлиқлири хадимлири, истанбул айродурумидин бу дөләткә қатнайдиған һава вә қуруқлуқ қатниши ширкәтлирини тәдбир елиш тоғрисида агаһландурди.

тәтқиқат оргининиң тәҗрибилик тәтқиқатчилар иштирак қилған йиғини 22- йанварда чақирилди. шу күни хитайниң бир авийатсийә ширкитиниң вухән – истанбул қатниши тохтитилди.

1 – февралда түркийә пуқралирини қайтуруп келиш үчүн хитайниң вухән шәһиригә барған һәрбий айропилан, 42 адәмни елип түркийәгә қайтти.

5 – февралдин башлап хитайдин келидиған барлиқ авийатсийә қатниши тохтитилди.

вирус иранда баш көтүргәндин кейин, икки дөләт арисидики қуруқлуқ чегралири 23 – февралда тақиветилди. арқидин авийатсийә қатнишиғиму чәклимиләр қойулди. түнүгүн (25- феврал) ирандики түркийә пуқралири қайтуруп келинди.

түркийәдә кесәллик байқалған тәқдирдә ташлинидиған қәдәмләр муәййәнләштурулди. барлиқ сәһийә орунлири бу һәқтики учурлардин вақипландурулди вә тәййар һаләткә кәлтүрүлди. дохтурханиларда тегишлик тәдбирләр йолға қойулди, нуқтилиқ дохтурханилар бекитилип, айрим йатақлар тәсис қилинди. вирусқа тақабил турушта ишлитилидиған дора записи йетәрлик сәвийәгә йәткүзүлди.

йуқумдин сақлиниш үчүн маска вә сәһийә хадимлири үчүн теббий лазимәтликләр билән кийим – кечәкләр тәййарланди.

ковид-19 үчүн йәрлик дийагноз қойуш усули тепип чиқилип, 90 минут билән 120 минут ичидә дийагноз нәтиҗисини елиш капаләткә игә қилинди.

бу җәрйанда сәһийә министири фаһрәттин коҗа анадолу агентлиқиниң тәһрирләр үстили сөһбәт пирограммисида сөз қилип, һазирғичә түркийәдә бирму йеңи типтики таҗсиман вирус билән йуқумланған өпкә йаллуғи (ковид-19) бимариниң байқалмиғанлиқини ейтти.

«барлиқ тәййарлиқлиримиз бар. қилиниши керәк болған һәрқандақ ишқа һәммила җәһәттин тәййармиз» дегән министир коҗа, иранға қарита йолға қойулған тәдбирләр даирисидә 4 чегра еғизиға сәһра дохтурханилириниң тәсис қилинғанлиқини әскәртти вә сөзини давамлаштуруп, «йеңи типтики таҗсиман вирус 33 дөләттә көрүлди, түркийәдә йоқ, болмаслиқи үчүн күч чиқириватимиз. хәлқимиз хаватирләнмисун.» дегәнләрни қәйт қилди.

дунйа сәһийә тәшкилати, йеңи типтики таҗсиман вирус тоғрисида 30 – йанварда байанат берип, «хәлқара амма сағламлиқи җиддий һалити» елан қилғаниди.

хитайниң вухән шәһиридә оттуриға чиққан вирус йүзисидин һазирғичә 2700 дин артуқ җенидин айрилди, 30 дин артуқ дөләткә тарқалған вирус түпәйли карантинаға елинғанлар сани 80 миңдин ашти.



مۇناسىۋەتلىك خەۋەرلەر