akar: idlib toghrisida barliq pilanlirimizni tüzüp qoyduq

türkiye awazi radiyosi xewiri: dölet mudapie ministiri hulusi akar bir téléwiziye qanilining ziyaritini qobul qildi. u türkiyening rusiye bilen idlib mesilisi boyiche ötküzgen uchrishishlirida qaysi nuqtigha kelgenliki heqqidiki soalgha: «sochi kélishimide, idlib jiddiychilikini peseytish rayonining chégraliri éniq belgilengen. bu yerde muhim bolghini belgilengenlarge boysunush. biz belgilengenlerge xilapliq qilghan beshshar esed hakimiyitige bolghan tesiringlardin paydilinip, beshshar esed hakimiyitining urush toxtitishqa boysunushini we sochi kélishimige boysunushini emelge ashurunglar dewatimiz» dédi.

u beshshar esed hakimiyitining idlibta yashaydighan 4-3 milyon xelqni térrorluq bilen eyiblishining «uqum jehettin beshshar esed hakimiyitining weyran bolushi» ikenlikini bildürüp, mundaq dédi:

«beshshar esed hakimiyiti bu yerde öktichilik qilghan hemme kishige térrorist tamghisini basti. ularning yashash hoquqi barliqini étirap qilmaydu. waril bombilirini öz ichige alghan halda héchnimini ayrimastin quruqluq we hawadin hujum qilip, hemme kishini qirghin qilmaqta. bu qetliamdur. türkiye bolush süpitimiz bilen, pütün tariximizda qilghinimizdek, bügünmu mezlumlarni qollashni dawamlashturimiz. biz bu dairide, u yerde mewjutluqimizni dawamlashturimiz we sochi kélishimige boysunushni telep qilimiz.»

u «féwral éyining axirida belgilengen yerge chékinish bolmisa, türkiye idlibtimu   tinchliq buliqi herikitige oxshash bir heriket bashlashqa teyyarmu?» dégen soalgha, mundaq jawab berdi:

«hörmetlik jumhur reis rejep tayyip erdoghan bu toghrida nishanni éniq körsitip, yolyoruq berdi. biz tégishlik pilanlirimizni tüzduq, a, b, s pilanlirimizni tüzduq. bu pilanlar waqti-saiti kelgende ijra qilinishqa bashlinidu.»

u «süriyening keynide rusiyening barliqini bilimiz. undaq bolsa, türkiye rusiye bilen udulmu udul kélemdu?» dégen soalgha:

«türkiyening rusiyege qarshi héchqandaq herikiti yoq. türkiyening nishani-beshshar esed hakimiyiti, urush toxtitishqa qarshi chiqqan kishi we guruppilardur. rayonda türkiye qisimliri bilen rusiye qisimliri otturisida nahayiti yaxshi diyalog bar. her qandaq waqitta her türlük uchurlar özara almashturuluwatidu» dep jawab berdi.