türkiye: idlibtiki xewp peyda qilidighan barliq jaylar zerbe bérish obyéktimiz bolidu

türkiye awazi radiyosi xewiri: feridun sinirlioghlu, b d t  xewpsizlik kéngishide söz qilip, süriyede hakimiyetning «térrorizmgha qarshi küresh» ni bahane qilip, hawa we quruqluqtin rehimsizlerche hujum qilishni dawamlashturuwatqanliqini, tiragédiyelik insaniy weziyetning eng yüksek pellige yetkenlikini bildürdi.

yéqinqi ikki ay ichide bir milyongha yéqin ademning yurt – makanidin mehrum qilinghanliqigha we süriyede 9 yildin buyan dawamlishiwatqan urushta eng éghir ammiwi xaraktérlik yurt – makanidin mehrum qilinish hadisisining yüz bergenlikige isharet qilip ötken feridun sinirlioghlu, «demeshiqtiki qirghinchliq sadir qilghuchi, 2019 – yili dékabir éyidin buyan 2000 din artuq ademni öltürdi؛ bu qilmishlar urush jinayiti we insaniyetke qarshi jinayet sadir qilish hésablinidu» dédi.

idlibtiki chédirlarning yéterlik emeslikini, derhal yéngi chédir sheherchilerning qurulushigha éhtiyaj barliqini qeyt qilghan sinirlioghlu, bu éhtiyajning qamdilishi üchün türkiyening b d t we gérmaniye bilen hemkarliship xizmet qilish arqiliq 9 milyondin artuq süriyelikni muhapizet astigha alghanliqini bildürdi.

hakimiyet küchlirining idlibtiki türkiye eskerlirige gherezlik halda hujum qilishni dawamlashturuwatqanliqini bildürgen feridun sinirlioghlu, türkiyening, 5 türk eskiri shéhit bolghan hujumlargha yolluq qoghdinish belgilimiliri dairiside derhal inkas qayturghanliqini xatirilitip ötti we sözini dawamlashturup, «türkiye (idlibta) tehdit shekillendürgen barliq nuqtilargha zerbe béridu. eskirimizni chékindürmeymiz, közitish nuqtiliridin chékinmeymiz. mushu ayning axirighiche hazirqi orunliridin chékinishi kérek bolghini hakimiyettur» dédi.