чавушоғлу давоста барзани билән көрүшти
дөлитимиз (түркийә җумһурийити) ташқи ишлар министири мәвлүт чавушоғлу, ирақ корд районлуқ һөкүмитиниң баш министири нәчирван барзани билән көрүшти.
түркийә авази радийоси хәвири: дөлитимиз (түркийә җумһурийити) ташқи ишлар министири мәвлүт чавушоғлу, шивейтсарийәниң давос базирида чақирилған 50 – нөвәтлик дунйа иқтисад мунбири йиғини җәрйанида ирақ корд районлуқ һөкүмитиниң баш министири нәчирван барзани билән көрүшти.
министир мәвлүт чавушоғлу нәчирван барзани билән өткүзүлгән йепиқ учриишишта, түркийәниң, америка билән иран оттурисидики сүркилиштин кейин ирақ билән йеқин һәмкарлиқ орнатқанлиқини, киризисниң һәл қилиниши үчүн актип тиришчанлиқ көрсәткәнликини әскәртти.
мушундақ қийин пәйтләрдә ирақниң бирлик вә пүтүнлүкиниң муһапизәт қилинишиниң әһмийитини тәкитлигән чавушоғлу, ирақтики барлиқ тәрәпләрниң дөләтниң бирлики вә пүтүнлүкини сақлап қелиш үчүн күч чиқириши керәкликини тәкитлиди.
у, ирақта баш көтүридиған мәзһәп характерлик йаки етник парчилинишниң хәтәрлик ақивәтләрни кәлтүрүп чиқиридиғанлиқиға ишарәт қилди вә сөзини давамлаштуруп, «ирақ корд районлуқ һөкүмити билән болған мунасивәтләрни гүлләндүрүшни давамлаштуримиз» деди.
ирақтики сақлиниватқан мәсилиләрниң балдуррақ бир тәрәп қилинип муқимлиқ орнитилиши үчүн түркийәниң қолидин келидиған барлиқ йардәмләрни қилидиғанлиқини билдүргән чавушоғлу, бу мәқсәттә мунасивәтлик тәрәпләр билән көрүшүватқанлиқлирини сөзлиригә илавә қилди.
