түркийә ливийәдә тинчлиқ үмидлирини күчәйтти

түркийә авази радийоси хәвири: җумһур рәис рәҗәп таййип әрдоған германийәдики учришишлирини ахирлаштуруп қайтиш сәпиридә, айропиланда мухбирларниң соаллириға җаваб бәрди.

у берлиндә чақирилған ливийә конферанси үстидә тохтилип: «биз күчлүк дөләт болсақ, биздин нурғун үмид күтүшләр болиду. түркийә тинчлиқниң ачқучидур. ливийә мәсилисидә басқан қәдәмлиримиз, мусапни тәңпуңлаштурди. буниңдин кейин, һәм әмәлийитимиздә һәмдә үстәлдә сийасий мусапини қоллашни давамлаштуримиз» деди.

у түркийәниң ливийәдики мәвҗудлуқиниң тинчлиқ үмидлирини күчәйткәнликини әскәртип: «террорлуққа қарши туруш нами астида қандақ ойунларниң ойналғанлиқини көрүватимиз. ливийә конферансида һафтәрниң лайиһә текстини имзалимаслиқи тосқунлуқ қилди. иш еғизда иштиракчиларниң гуваһлиқи билән қалди. иншааллаһ нәтиҗиси хәйрилик болар» деди.

у ливийәдә русийә пирезиденти владимир путин билән бирликтә қилған уруш тохтитиш чақириқиға бойсунған әһвалда сийасий мусапә йолиниң ечилидиғанлиқини әскәртти.

гиретсийә баш министири кирийакос мичотакисниң һафтәрни гиретсийәгә тәклип қилғанлиқи һәққидиму тохталди. у: «мичотакис бизни қишқиртиш үчүн һафтәрни гиретсийәгә чақирди» деди.

рәҗәп таййип әрдоған бир рәһбәрниң өзигә: «мичотакисниң силәр билән мунасивәтни қайта оңшашни халайду» дегәнликини, өзиниң «алди билән мичотакис хаталиқини түзәтсун, андин мунасивәтни оңшаш наһайити асан» дәп җаваб бәргәнликини ейтти, бирақ у рәһбәрниң нам-шәрипини ашкарилимиди.