алтун: түркийә натодин күткәндәк қоллашқа еришәлмиди

түркийә җумһур рәислик сарийи учур-алақә идариси башлиқи фаһрәттин алтун түркийәниң йеқинқи йилларда натодин күткинидәк қоллашқа еришәлмигәнликини билдүрди.

алтун: түркийә натодин күткәндәк қоллашқа еришәлмиди

түркийә авази радийоси хәвири: түркийә җумһур рәислик сарийи учур-алақә идариси башлиқи фаһрәттин алтун твиттерда инглизчә байанат елан қилип, түркийәниң натоға болған садиқлиқиға вә қошқан төһпилиригә җавабән, хәвпсизлик әндишәлириниң ахирлишишини әмәлий һәрикәт билән қоллайдиған ортақ хәвпсизлик истратегийәси түзүлүшини үмид қилидиғанлиқини қәйт қилди.

у мунуларни билдүрди:

«хәлқаралиқ хәвпсизлик муһити барғансери ениқсиз болуватқан мушу күнләрдә, бир қатар қийин қарарларни елиши керәк болған нато муһим йиғинға тәййарлиниватиду. йеқинқи йилларда бихәтәрликимизгә селиниватқан тәһдитләр ешиватқан әһвалда, түркийә истратегийәлик дийалогқа башчилиқ қилинишқа йардәм қилишқа тәййар. нато әза дөләтләрниң хәвпсизлик әндишәлирини чүшиниши, етирап қилиши вә тактикилиқ һәмдә һәрбий һәрикәтни асас қилған һәл қилиш чарисини тепиши керәк. иттипақниң ортақ бихәтәрлики пәқәт вә пәқәт әза дөләтләрниң әндишәлириниң түгиши билән мумкин болиду.»

у түркийәниң йеқинқи йилларда натодин күткинидәк қоллашқа еришәлмигәнликини әскәртти вә сөзлирини мундақ давамлаштурди:

«иттипақтики иккинчи чоң армийәгә игә болған түркийә, натодики нурғун һәрикәтләргә қатнашти. һәссә қошушни давамлаштуримиз, әмма шуниң билән бирликтә әндишәлиримизгә мунасивәтлик қоллашқа еришишниму күтмәктимиз.

нато иттипаққа вә әза дөләтләргә қаритилған тәһдитләрни, бу тәһдитләрниң маһийитини ениқ бәлгиләш арқилиқ һәл қилалиши мумкин. коллектип хәвпсизлик, тинчлиқ вақтида муқимлиқниң, уруш вақтида болса, бихәтәрликниң ул тешидур. әза дөләтләрниң йоллуқ хәвпсизлик қариши вә әндишәлириниң тегишлик шәкилдә етирап қилинмаслиқи, иттипақни аҗизлитиш билән биргә, натоға болған ишәнчниму аҗизлитиду.»



مۇناسىۋەتلىك خەۋەرلەر