erdoghan: bu layihe türkiyening tinchliq pilanining eng roshen namayendisi

jumhur reis rejep tayyip erdoghan trans anadolu tebiiy gaz turuba liniyesi layihesining türkiyening tinchliq pilanining eng roshen namayendisi ikenlikini éytti.

erdoghan: bu layihe türkiyening tinchliq pilanining eng roshen namayendisi

türkiye awazi radiyosi xewiri: erdoghan edirnening ipsala nahiyeside trans anadolu tebiiy gaz turuba liniyesi layihesi MS4  ölchesh istansisidiki TANAP ni yawropagha tutashturush murasimida qilghan sözide mundaq dédi: «döletlirimiz we rayonimiz namidin ishqa ashurulghan tarixiy bir dewrni bashtin kechürüwatimiz.  buning rayonluq bir layihe, jümlidin dölitimizning tinchliq pilani ikenlikini alahide tekitlep ötimen. trans anadolu tebiiy gaz turuba liniyesi layihesi ezerbeyjandin yawropagha sozulidighan 3 ming 500 kilométirliq énérgiye karidorining eng muhim bir parchisi hésablinidu. 2012 – yildin buyan bu layiheni ishqa ashurush yolida nahayiti zor tirishchanliqlarni körsitiwatimiz, bu sayida layiheni ishqa ashurush xizmetliri pilan boyiche muweppeqiyetlik halda ishliniwatidu. bu layihe arqiliq 16 milyard kub métirliq ezerbeyjan tebiiy gazidin türkiye we yawropaning behrimen bolush ümidi  réalliqqa aylandi. shuni alahide tekitlep ötimenki, bashqilarning tehditlirige hem heywilirige qarap aqdéngizdiki paraxotlirimizni chékindürmeymiz. dölitimiz ne türkiyening, ne shimaliy qibris türk jumhuriyitining heq – hoquqlirining depsende qilinishigha esla yol qoymaydu. bu dairide liwiye bilen muhim kélishim tüzduq, bu kélishimning bashqa türlirimu heriketke keltürülidu, shuning bilen, aqdéngizdiki néfit qidirip tekshürüsh paaliyetlirimiz  arqiliq aqdéngizdin qan emes, tinchliq we muqimliq aqidu.»

ezerbeyjan pirézidénti ilham eliyéw mundaq dédi: «bügün tarixiy bir kündur. trans anadolu tebiiy gaz turuba liniyesi layihesining uzun ömürlük bolushigha tilekdashmen. 7 döletni bir - birige tutashturidighan we xelqaraliq hemkarliq rishtisi bolghan bu layihedin hem türkiye, hem ezerbeyjan, hemde bashqa döletler behrimen bolidu.»

énérgiye we tebiiy bayliqlar ministiri fatih dönmez mundaq dédi: «trans anadolu tebiiy gaz turuba liniyesi layihesi hemmidin bekrek muweppeqiyet hékayisi hésablinidu. <ikki ten, bir roh> éngi ichide heriket qiliwatqan ezerbeyjan bilen türkiye bu arqiliq ewladlirini bir - birige téximu yéqinlashturdi. buning netijiside türkiyening tebiiy gazgha bolghan éhtiyaj mesilisi pütünley hel boldi. yawropani tebiiy gaz bilen teminlesh üchün biz teyyarmiz. buningdin kéyinki basquchni yawropaliq dostlirimizgha amanet qoyimiz.»



مۇناسىۋەتلىك خەۋەرلەر