әрдоған: бу лайиһә түркийәниң тинчлиқ пиланиниң әң рошән намайәндиси

җумһур рәис рәҗәп таййип әрдоған транс анадолу тәбиий газ туруба линийәси лайиһәсиниң түркийәниң тинчлиқ пиланиниң әң рошән намайәндиси икәнликини ейтти.

әрдоған: бу лайиһә түркийәниң тинчлиқ пиланиниң әң рошән намайәндиси

түркийә авази радийоси хәвири: әрдоған әдирнәниң ипсала наһийәсидә транс анадолу тәбиий газ туруба линийәси лайиһәси MS4  өлчәш истансисидики TANAP ни йавропаға туташтуруш мурасимида қилған сөзидә мундақ деди: «дөләтлиримиз вә районимиз намидин ишқа ашурулған тарихий бир дәврни баштин кәчүрүватимиз.  буниң районлуқ бир лайиһә, җүмлидин дөлитимизниң тинчлиқ пилани икәнликини алаһидә тәкитләп өтимән. транс анадолу тәбиий газ туруба линийәси лайиһәси әзәрбәйҗандин йавропаға созулидиған 3 миң 500 километирлиқ енергийә каридориниң әң муһим бир парчиси һесаблиниду. 2012 – йилдин буйан бу лайиһәни ишқа ашуруш йолида наһайити зор тиришчанлиқларни көрситиватимиз, бу сайида лайиһәни ишқа ашуруш хизмәтлири пилан бойичә мувәппәқийәтлик һалда ишлиниватиду. бу лайиһә арқилиқ 16 милйард куб метирлиқ әзәрбәйҗан тәбиий газидин түркийә вә йавропаниң бәһримән болуш үмиди  реаллиққа айланди. шуни алаһидә тәкитләп өтимәнки, башқиларниң тәһдитлиригә һәм һәйвилиригә қарап ақдеңиздики парахотлиримизни чекиндүрмәймиз. дөлитимиз нә түркийәниң, нә шималий қибрис түрк җумһурийитиниң һәқ – һоқуқлириниң дәпсәндә қилинишиға әсла йол қоймайду. бу даиридә ливийә билән муһим келишим түздуқ, бу келишимниң башқа түрлириму һәрикәткә кәлтүрүлиду, шуниң билән, ақдеңиздики нефит қидирип тәкшүрүш паалийәтлиримиз  арқилиқ ақдеңиздин қан әмәс, тинчлиқ вә муқимлиқ ақиду.»

әзәрбәйҗан пирезиденти илһам әлийев мундақ деди: «бүгүн тарихий бир күндур. транс анадолу тәбиий газ туруба линийәси лайиһәсиниң узун өмүрлүк болушиға тиләкдашмән. 7 дөләтни бир - биригә туташтуридиған вә хәлқаралиқ һәмкарлиқ риштиси болған бу лайиһәдин һәм түркийә, һәм әзәрбәйҗан, һәмдә башқа дөләтләр бәһримән болиду.»

енергийә вә тәбиий байлиқлар министири фатиһ дөнмәз мундақ деди: «транс анадолу тәбиий газ туруба линийәси лайиһәси һәммидин бәкрәк мувәппәқийәт һекайиси һесаблиниду. <икки тән, бир роһ> еңи ичидә һәрикәт қиливатқан әзәрбәйҗан билән түркийә бу арқилиқ әвладлирини бир - биригә техиму йеқинлаштурди. буниң нәтиҗисидә түркийәниң тәбиий газға болған еһтийаҗ мәсилиси пүтүнләй һәл болди. йавропани тәбиий газ билән тәминләш үчүн биз тәййармиз. буниңдин кейинки басқучни йавропалиқ достлиримизға аманәт қойимиз.»



مۇناسىۋەتلىك خەۋەرلەر