erdoghan: islam qérindashliqining chek – chégrasi yoq

türkiye awazi radiyosi xewiri: erdoghan istanbulda ötküzülgen «peyghember eleyhissalamning dunyagha kelgenlikini xatirilesh heptiliki» pirogrammisining échilishida qilghan sözide, islam dunyasi bashtin kechürüwatqan musibetler heqqide toxtaldi, hemde muhajirlar bilen ensarilarning  mislisiz qérindashliq munasiwitini xatirilitip mundaq dédi: «janabiy allah bizge ensari bolush pursiti yaritip berdi, bombilardin qachqan süriyelik qérindashlirimizghimu muhajir bolushni nésip qildi. xudayim buyrisa, süriyelik qérindashlirimiz  öz yurtigha süriyede weziyet ongshalghandin kéyin qaytidu. emma biz ularni qoghlap chiiriwételmeymiz, ularni bombilarning astigha ewetelmeymiz. chünki bizning qérindashliq éngimiz buni teqezza qilidu. shuni alahide tekitlep ötimenki, insanni insan qilghan qimmetler tarixtin buyanqi eng éghir hujumlargha duch kéliwatidu. qanche esirlerdin buyan tinchliq we ésenlik diyari bolup kelgen islam diyarlirini nöwette yétim – yésirlarning, ayallarning, urushta perzentliridin ayrilip qalghan ata – anilarning échinishliq nale – peryadliri qaplap ketmekte. medeniyetlerning bosughisi bolghan qedimiy sheherlirimiz öz xelqige zulum séliwatqan diktatorlarning tömür tapini astida xarabiliklerge aylanmaqta. axirida shuni eskertip ötimenki, térrorluq teshkilatlirining salghan ziyanlirini éytip tügetkili bolmaydu. jümlidin térrorluq teshkilatliri jamelerde namaz oquwatqan möminlerni, mektepke kétiwatqan balilarni wehshiylerche qetl qilmaqta.  islam medeniyiti bir tereptin daésh, boko haram, eshshebab, fethullahchi térrorluq teshkilati, p k k, y p g qatarliq qatilliq guruhlirining, yene bir tereptin, jahalet guruhlirining irqiy qirghinchiliqigha duch kelmekte. künimizdiki ehliselipler hésablinidighan yéngi natsist térrorluq teshkilatliri dunya boyiche eng tereqqiy tapqan démokratik ellerde musulmanlargha kündilik hayatni zindangha aylandurmaqta.»