әрдоған: ислам қериндашлиқиниң чәк – чеграси йоқ

җумһур рәис рәҗәп таййип әрдоған ислам қериндашлиқиниң чәк – чеграси йоқлуқини ейтти.

1303186
әрдоған: ислам қериндашлиқиниң чәк – чеграси йоқ

түркийә авази радийоси хәвири: әрдоған истанбулда өткүзүлгән «пәйғәмбәр әләйһиссаламниң дунйаға кәлгәнликини хатириләш һәптилики» пирограммисиниң ечилишида қилған сөзидә, ислам дунйаси баштин кәчүрүватқан мусибәтләр һәққидә тохталди, һәмдә муһаҗирлар билән әнсариларниң  мислисиз қериндашлиқ мунасивитини хатирилитип мундақ деди: «җанабий аллаһ бизгә әнсари болуш пурсити йаритип бәрди, бомбилардин қачқан сүрийәлик қериндашлиримизғиму муһаҗир болушни несип қилди. худайим буйриса, сүрийәлик қериндашлиримиз  өз йуртиға сүрийәдә вәзийәт оңшалғандин кейин қайтиду. әмма биз уларни қоғлап чиириветәлмәймиз, уларни бомбиларниң астиға әвәтәлмәймиз. чүнки бизниң қериндашлиқ еңимиз буни тәқәзза қилиду. шуни алаһидә тәкитләп өтимәнки, инсанни инсан қилған қиммәтләр тарихтин буйанқи әң еғир һуҗумларға дуч келиватиду. қанчә әсирләрдин буйан тинчлиқ вә есәнлик дийари болуп кәлгән ислам дийарлирини нөвәттә йетим – йесирларниң, айалларниң, урушта пәрзәнтлиридин айрилип қалған ата – аниларниң ечинишлиқ налә – пәрйадлири қаплап кәтмәктә. мәдәнийәтләрниң босуғиси болған қәдимий шәһәрлиримиз өз хәлқигә зулум селиватқан диктаторларниң төмүр тапини астида харабиликләргә айланмақта. ахирида шуни әскәртип өтимәнки, террорлуқ тәшкилатлириниң салған зийанлирини ейтип түгәткили болмайду. җүмлидин террорлуқ тәшкилатлири җамәләрдә намаз оқуватқан мөминләрни, мәктәпкә кетиватқан балиларни вәһшийләрчә қәтл қилмақта.  ислам мәдәнийити бир тәрәптин даеш, боко һарам, әшшәбаб, фәтһуллаһчи террорлуқ тәшкилати, п к к, й п г қатарлиқ қатиллиқ гуруһлириниң, йәнә бир тәрәптин, җаһаләт гуруһлириниң ирқий қирғинчилиқиға дуч кәлмәктә. күнимиздики әһлисәлипләр һесаблинидиған йеңи натсист террорлуқ тәшкилатлири дунйа бойичә әң тәрәққий тапқан демократик әлләрдә мусулманларға күндилик һайатни зинданға айландурмақта.»



مۇناسىۋەتلىك خەۋەرلەر