erdoghan rusiye bilen hasil qilinghan süriyege alaqidar kélishimning mezmunini élan qildi
jumhur reis rejep tayyip erdoghan, türkiye – süriye chégrasining 10 kilométir ichki qismida türk we rus eskerlirining charlash élip bérishni bashlaydighanliqini uqturdi.
türkiye awazi radiyosi xewiri: xizmet ziyariti munasiwiti bilen rusiyening sochi shehirige barghan jumhur reis rejep tayyip erdoghan bilen sahibxan döletning pirézidénti wiladimir putin, pirézidéntliq mehkimisi turalghusida 6 saet dawamlashqan ayrim uchrishishtin kéyin qoshma muxbirlarni kütüwélish yighini ötküzdi. erdoghan yighinda söz qilip, bir mezgil térror bilen nami chiqqan süriyening, türkiyening tirishchanliqliri sayisida qaytidin xatirjemlik we muqimliqqa érishkenlikini tekitlep ötti.
«350 mingi kord bolup jemiy 3 milyon 650 ming süriyelik qérindishigha yéqinqi 8 yérim yildin buyan qoynini échip kelgen bir döletmiz. emdi bu qérindashlirimizning weten hesritini peskoygha chüshüridighan qedemlerni tashlishimiz kérek» dégen jumhur reis erdoghan, putin bilen tinchliq buliqi herbiy herikiti dairisidiki eng yéngi özgirishler toghrisida sözleshkenlikini éytti.
buninggha asasen, türkiye – süriye chégrasidiki (bölgünchi térrorluq teshkilati p k k ning süriye qaniti) p y d unsurlirining 23 – öktebir kündüz saet 12:00 din bashlap 150 saet ichide qoralliri bilen birlikte 30 kilométir yiraqliqqa chékinidighanliqini bildürgen erdoghan, arqidin mezkur rayonning 10 kilométir chongqurluqida türk – rus eskerlirining charlash élip bérishni bashlaydighanliqini qeyt qildi.
wiladimir putin bolsa sözide, türkiyening chégra bixeterliki toghrisidiki endishilirini chüshinidighanliqlirini bildürüp, «türkiyening milliy bixeterlikini kapaletke ige qilish yolida qedem tashlimaqchi bolghanliqini chüshinimiz, (buni) köp qétim tilgha alduq» dédi.
muxbirlarni kütüwélish yighinidin kéyin 10 maddiliq kélishim tékisti oqup ötüldi. tékistni oqughan türkiye jumhuriyiti tashqi ishlar ministiri mewlüt chawushoghlu, süriyening tel abyad we resuleyin rayonlirini öz ichige alghan mewjut tinchliq buliqi herbiy herikiti sahesidiki kona tüzümning saqlinip qélinidighanliqini bildürdi.
türkiye armiyesining 9 – öktebirde süriyening shimalidiki firat deryasining sherqiy qismida bashlighan herbiy herikiti – amérika qoshma ishtatliri bilen imzalanghan kélishim dairiside – peyshenbe küni toxtitip qoyulghanidi.
