fuat oktay bakuda shéhitzarliqlarni ziyaret qildi
türkiye muawin jumhur reisi fuat oktay ejdadlar miras qaldurghan meniwi bayliqlarni kelgüsige yüzlendürüsh üchün xizmet qiliwatqanliqlirini éytti.
türkiye awazi radiyosi xewiri: türkiye muawin jumhur reisi fuat oktay tünügün (15-séntebir) türkiye-ezerbeyjan 8-birleshme iqtisadiy komitét yighinigha qatnishish üchün ezerbeyjan paytexti bakugha yétip bardi.
u bügün (16-séntebir) yighin uchrishishliri dairiside, ezerbeyjanning merhum pirézidénti haydar eliyéw qebrisi bar faxri hiyaban dölet qebristanliqini ziyaret qildi. u haydar eliyéwning qebrisige we 20-yanwar shéhitlirining qebriliri jaylashqan ebediy atesh xatire munarigha gülchembirek qoydi hemde dua qildi.
u arqidin bakudiki türk shéhitzarliqigha bardi we xatire munarigha gülchembirek qoyup, xatire deptirige: «türk xelqining baqiy bolushi üchün janlirini péda qilghan eziz shéhitlirimiz, bu xelqning qehriman ewladliri. bakuning azadliqining 101 yilliqini jushqun keypiyat ichide sherep bilen xatirilewatqan bügünki künlerde, silerning meniwi huzurunglarda bolghanliqimdin özemni shereplik we xushal hés qilimen. qérindash ezerbeyjanning mudapiesi we muqeddes weten zéminlirining musteqilliqi üchün jéninglarni péda qilip, tillarda dastan qehrimanliqinglarni namayan qildinglar. körsetken qehrimanliqinglarni we étiqadinglarni minnet bilen xatirileymiz. tewrenmes étiqadinglar bilen qilghan pédakarliqinglar, bügünmu rishtilirimizning we qérindashliqimizning küchiyishide köwrük bolush wezipisini ötimekte. bizge miras qaldurghan meniwi bayliqlarni kelgüsige yüzlendürüsh üchün barliq küchimiz bilen tirishimiz. silerni rehmet we hörmet bilen esleymiz. rohinglar shad bolsun» dep béghishlima yazdi.
