qalin, türkiyening firat deryasining sherqiy qismigha alaqidar siyasetliri toghrisida toxtaldi

jumhur reislik mehkimisi bayanatchisi ibrahim qalin, «munbichtikige oxshash koldurlitish, diqqetni chéchish, nishandin aghdurush dégendek usullarning ishqa sélinishigha elwette yol qoymaymiz» dédi.

qalin, türkiyening firat deryasining sherqiy qismigha alaqidar siyasetliri toghrisida toxtaldi

türkiye awazi radiyosi xewiri: ibrahim qalin, jumhur reis rejep tayyip erdoghan riyasetchilikide jumhur reislik mehkimiside tünügün chaqirilghan jumhur reislik mehkimisi ichki kabénit yighini dawamlishiwatqan peytte bayanat berdi we muxbirlarning küntertipke alaqidar soallirigha jawab berdi.

u, jumhur reis erdoghanning yighinning échilishida söz qilip, türkiyediki omumiy siyasiy weziyet, rayonning xewpsizlik weziyiti, iqtisad we siyasiy sahede tashlinidighan qedemler toghrisida toxtalghanliqini bildürdi.

erdoghanning, firat deryasining sherqidiki özgirishlerni yéqin küzitishni dawamlashturidighanliqlirini tilgha alghanliqini bildürgen qalin, idlibtiki özgirishlernimu barliq dairilerning yéqindin küzitiwatqanliqini éytti.

qalin, süriyening idlib shehiride nahayiti muhim bir wezipini ada qiliwatqanliqlirini eskertip, düshenbe küni jumhur reis erdoghan riyasetchilikide enqerede chaqirilidighan üch terep bashliqlar yighinida bu mesililerning muzakire qilinidighanliqini qeyt qildi.

yighinda, rayondiki xewpsizlik mesilisige chétishliq mesililerningmu etrapliq shekilde muzakire qilinidighanliqini bildürgen qalin, bolupmu firat deryasining sherqidiki özgirishlerning asasiy küntertip maddilirining biri ikenlikini éytti.

qalin, amérika bilen hasil qilinghan kélishim dairiside, bixeter rayon tesis qilish qedemlirining tézlik bilen tashlanghanliqini, ikki kün ilgiri tunji qétim quruqluq qisimlirining charlash élip barghanliqini, uningdin ilgiri tik uchar ayropilan bilen hawadin charlash élip bérilghanliqini xatirilitip ötti.

ortaq heriket merkiziningmu qurulghanliqini tilgha alghan qalin, buninggha alaqidar xizmetlerning dawamlishiwatqanliqini eskertti.

«bixeter rayon tesis qilish, bashqurush, amanliqni saqlash, neq meydandiki ehwallarning bizning xadimlirimiz teripidin musteqil halda jezmleshtürülüshi üchün, amérikiliq emeldarlar bilen dölet mudapie ministirliqimiz, istixbarat idarimiz we bashqa tarmaqlirimiz hemkarliship xizmet qilishni dawamlashturmaqta» dégen qalin, «bu yerde, buningdin ilgiri hörmetlik jumhur reisimizmu, hörmetlik tashqi ishlar ministirimizmu tilgha élip ötkendek, munbichtikige oxshash koldurlitish, diqqetni chéchish, nishandin aghdurush dégendek usullarning ishqa sélinishigha elwette yol qoymaymiz. békitken belgilimilirimiz dairiside bixeter rayonda firat deryasining sherqide qilinishi kérek bolghan ishlar éniqtur. bularni qilchilikmu yol qoymastin qetiy shekilde ijra qilish, xizmet musapisining süritini ashurush lazim. hörmetlik jumhur reisimizning 21 – séntebirde bashlinidighan nyu yorktiki b d t diki uchrishishlirining muhim küntertip maddilirining biri bu mesile bolidu» dégenlerni qeyt qildi.

ibrahim qalin sözi jeryanida yene, diyarbakirda perzentliri bölgünchi térrorluq teshkilati p k k teripidin élip qéchilghan anilarning namayan qilghan jasaritining muhimliqinimu tilgha élip ötti.

u, chet el metbuatining bu weqeni körmeske sélishini tenqid qilip, «chet el metbuatining köngül bölmesliki heqiqetenmu diqqet qilishqa erziydu. kichik weqelerni yoghinitip béridighan xelqara médiyaning bu mesilige süküt qilishi belkim meqsetlik halda mushundaq qilishi alahide diqqet qilishqa erzisimu, bu bizning iradimizgha, özara hemkarliqimizgha tesir körsetmeydu» dégenlerni sözlirige ilawe qildi.


خەتكۈچ: ibrahim qalin , idlib , süriye , türkiye

مۇناسىۋەتلىك خەۋەرلەر