қалин, түркийәниң фират дәрйасиниң шәрқий қисмиға алақидар сийасәтлири тоғрисида тохталди

җумһур рәислик мәһкимиси байанатчиси ибраһим қалин, «мунбичтикигә охшаш колдурлитиш, диққәтни чечиш, нишандин ағдуруш дегәндәк усулларниң ишқа селинишиға әлвәттә йол қоймаймиз» деди.

қалин, түркийәниң фират дәрйасиниң шәрқий қисмиға алақидар сийасәтлири тоғрисида тохталди

түркийә авази радийоси хәвири: ибраһим қалин, җумһур рәис рәҗәп таййип әрдоған рийасәтчиликидә җумһур рәислик мәһкимисидә түнүгүн чақирилған җумһур рәислик мәһкимиси ички кабенит йиғини давамлишиватқан пәйттә байанат бәрди вә мухбирларниң күнтәртипкә алақидар соаллириға җаваб бәрди.

у, җумһур рәис әрдоғанниң йиғинниң ечилишида сөз қилип, түркийәдики омумий сийасий вәзийәт, районниң хәвпсизлик вәзийити, иқтисад вә сийасий саһәдә ташлинидиған қәдәмләр тоғрисида тохталғанлиқини билдүрди.

әрдоғанниң, фират дәрйасиниң шәрқидики өзгиришләрни йеқин күзитишни давамлаштуридиғанлиқлирини тилға алғанлиқини билдүргән қалин, идлибтики өзгиришләрниму барлиқ даириләрниң йеқиндин күзитиватқанлиқини ейтти.

қалин, сүрийәниң идлиб шәһиридә наһайити муһим бир вәзипини ада қиливатқанлиқлирини әскәртип, дүшәнбә күни җумһур рәис әрдоған рийасәтчиликидә әнқәрәдә чақирилидиған үч тәрәп башлиқлар йиғинида бу мәсилиләрниң музакирә қилинидиғанлиқини қәйт қилди.

йиғинда, райондики хәвпсизлик мәсилисигә четишлиқ мәсилиләрниңму әтраплиқ шәкилдә музакирә қилинидиғанлиқини билдүргән қалин, болупму фират дәрйасиниң шәрқидики өзгиришләрниң асасий күнтәртип маддилириниң бири икәнликини ейтти.

қалин, америка билән һасил қилинған келишим даирисидә, бихәтәр район тәсис қилиш қәдәмлириниң тезлик билән ташланғанлиқини, икки күн илгири тунҗи қетим қуруқлуқ қисимлириниң чарлаш елип барғанлиқини, униңдин илгири тик учар айропилан билән һавадин чарлаш елип берилғанлиқини хатирилитип өтти.

ортақ һәрикәт мәркизиниңму қурулғанлиқини тилға алған қалин, буниңға алақидар хизмәтләрниң давамлишиватқанлиқини әскәртти.

«бихәтәр район тәсис қилиш, башқуруш, аманлиқни сақлаш, нәқ мәйдандики әһвалларниң бизниң хадимлиримиз тәрипидин мустәқил һалда җәзмләштүрүлүши үчүн, америкилиқ әмәлдарлар билән дөләт мудапиә министирлиқимиз, истихбарат идаримиз вә башқа тармақлиримиз һәмкарлишип хизмәт қилишни давамлаштурмақта» дегән қалин, «бу йәрдә, буниңдин илгири һөрмәтлик җумһур рәисимизму, һөрмәтлик ташқи ишлар министиримизму тилға елип өткәндәк, мунбичтикигә охшаш колдурлитиш, диққәтни чечиш, нишандин ағдуруш дегәндәк усулларниң ишқа селинишиға әлвәттә йол қоймаймиз. бекиткән бәлгилимилиримиз даирисидә бихәтәр районда фират дәрйасиниң шәрқидә қилиниши керәк болған ишлар ениқтур. буларни қилчиликму йол қоймастин қәтий шәкилдә иҗра қилиш, хизмәт мусаписиниң сүритини ашуруш лазим. һөрмәтлик җумһур рәисимизниң 21 – сентәбирдә башлинидиған нйу йорктики б д т дики учришишлириниң муһим күнтәртип маддилириниң бири бу мәсилә болиду» дегәнләрни қәйт қилди.

ибраһим қалин сөзи җәрйанида йәнә, дийарбакирда пәрзәнтлири бөлгүнчи террорлуқ тәшкилати п к к тәрипидин елип қечилған аниларниң намайан қилған җасаритиниң муһимлиқиниму тилға елип өтти.

у, чәт әл мәтбуатиниң бу вәқәни көрмәскә селишини тәнқид қилип, «чәт әл мәтбуатиниң көңүл бөлмәслики һәқиқәтәнму диққәт қилишқа әрзийду. кичик вәқәләрни йоғинитип беридиған хәлқара медийаниң бу мәсилигә сүкүт қилиши бәлким мәқсәтлик һалда мушундақ қилиши алаһидә диққәт қилишқа әрзисиму, бу бизниң ирадимизға, өзара һәмкарлиқимизға тәсир көрсәтмәйду» дегәнләрни сөзлиригә илавә қилди.



مۇناسىۋەتلىك خەۋەرلەر