qalin: türkiye rusiyege naraziliq bildürdi

jumhur reislik mehkimisi bayanatchisi ibrahim qalin, türkiyening, aldinqi küni süriyening idlib shehiride türkiyening herbiy aptomobil etritige qilinghan hujum toghrisidiki naraziliqini rusiye terepke yetküzgenlikini bildürdi.

qalin: türkiye rusiyege naraziliq bildürdi

türkiye awazi radiyosi xewiri: bayanatchi ibrahim qalin jumhur reislik mehkimisi ichki kabinét yighinidin kéyin bayanat bérip, «naraziliqimizni rusiye terepke yetküzduq. aldimizdiki künlerde hörmetlik jumhur reisimiz rejep tayyip erdoghan rusiye pirézidénti wiladimir putin bilen téléfonda körüshidu» dédi.

u yene türkiyening amérika qoshma ishtatliri bilen süriyening shimalida bixeter rayon tesis qilish pilanliri toghrisida toxtilip, «emeliyleshtürülüshi, musapisi we chek – chégrasigha alaqidar muzakiriler dawamlishiwatidu. asasiy ramka toghrisida birdeklik hasil qilghanliqimizni éytishimiz mumkin» dédi.

ibrahim qalin, firat deryasining sherqide türkiye we amérika eskerlirining birleshme charlash élip bérish xizmetlirining yéqinda bashlinidighanliqini bildürdi.

süriyening idlib shehiridiki 9 – nomurluq közitish nuqtisining taqiwétilishi yaki bashqa jaygha yötkilishining mumkin emeslikini tilgha alghan qalin, «hemmisi hazirqi orunlirida turup paaliyetlirini dawamlashturidu» dégenlerni qeyt qildi.

u, esed hakimiyiti we rusiyege chaqiriq qilip, «esed hakimiyiti we uni qollawatqan rusiye fédératsiyesige qilghan (kélishimge) xilap qilmishlirigha xatime bérish toghrisidiki chaqiriqimizni tekrarlaymen» dédi.

jumhur reislik mehkimisi bayanatchisi ibrahim qalin bir soalgha jawab bérip, jumhur reis erdoghanning amérika pirézidénti donald tramp bilenmu téléfonda körüshüshke teyyarliniwatqanliqini eskertti.

qalin, jumhur reis erdoghanning riyasetchilikide 16 – séntebirde rusiye we iranning ishtirak qilishi bilen üch terep bashliqlar yighini chaqirilidighanliqinimu sözlirige ilawe qildi.


خەتكۈچ: amérika , süriye , rusiye , türkiye

مۇناسىۋەتلىك خەۋەرلەر