türkiye térrorluq karidorini bitchit qilishta qetiy iradige ige
türkiye jumhur reisi rejep tayyip erdoghan süriyede firat deryasining sherqidiki térrorluq karidorini bitchit qilish iradilirining qetiy ikenlikini éytti.
türkiye awazi radiyosi xewiri: türkiye jumhur reisi rejep tayyip erdoghan adalet we tereqqiyat partiyesi (AK Parti) ning wilayetlik shöbe bashliqliri yighinida söz qildi.
u 2019-yili 27-mayda iraqning shimalida bölgünchi térrorluq teshkilati p k k gha qarshi bashlanghan «penje herbiy herikiti» toghrisida toxtaldi. u: «ötken hepte iraqning erbil shehiridiki konsulxana xadimigha qilinghan hujum, herikitimizning qanchilik toghra ikenlikini ispatlaydu. meqsitimiz-térroristlarni chégra linyesidiki sarp taghlirining ornigha, chégramizgha yéqin bolghan tüzlenglikte tosidighan bixeterlik linyesi teshkil qilish. buni emelge ashurghan waqtimizda, inshaallah térrorluq teshkilati uwa tutqan kandil téghi deydighan mesile qalmaydu» dédi.
rejep tayyip erdoghan amérika bilen ötküzülüwatqan süriyede bixeterlik rayon tesis qilish söhbetliri üstidimu toxtaldi. u mundaq dédi:
«netijisi qandaq bolushidin qetiynezer, bizning firatning sherqidiki térrorluq karidorini bitchit qilish iradimiz qetiy.»
u rusiyedin sétiwélinghan «S-400» hawa mudapie sistémilirini qorashturush we telim-terbiye ishliridin kéyin, 2020-yili aprélda ishqa kirishtürülidighanliqini eskertti. u amérika «F-35» ayropilanlirini bermigen ehwalgha qarita: «tedbirlirimizni alimiz, bashqa yaqqa yüzlinimiz» dédi.
u hazirmu türkiyening yawropaning eng yéqin, eng küchlük, eng paydiliq we her nuqtidin éytqanda eng qimmetlik dost namzati ikenliki tekitlep: «mushundaq bolup qélishni xalaymiz. buning üchün yawropaliqlarning oxshash niyetke ige ikenlikini körsekla kupaye. bizge bir qedem yéqinlashqangha, biz ikke qedem yéqinlishimiz» dédi.
