chelik amérikigha jawab qayturdi
adalet we tereqqiyat partiyesi bayanatchisi ömer chelik amérika qoshma ishtatlirigha jawab qayurdi.
türkiye awazi radiyosi xewiri: chelik adalet we tereqqiyat partiyesi bash merkizide élan qilghan bayanatida, barliq tereplerning shimaliy atlantik ehdi teshkilatining halqiliq döliti bolghan türkiyening nato ichidiki rolining qimmitini bilishi lazimliqini tekitlidi.
amérika qoshma ishtatliri muawin pirézidénti mayk pénsning, «türkiye, tarixidiki eng muweppeqiyetlik teshkilatning muhim bir ittipaqdishi süpitide qélish, yaki teshkilatqa ziyan yetküzidighan, perwasizlarche qararlarni chiqirip, natoning bixeterlikini xewpke duchar qilishtin ibaret ikki yoldin birini tallishi kérek» dégen sözlirige jawab qayturup mundaq dédi: «rastini éytqanda, bunchilik derijide türkiyeni eyibleydighan we yiraqni körelmeydighan bu pozitsiye aldida hang – tang qalduq. pénsning bu bayanati mundaq yéngi bir ehwalni aydinglashturup berdi: uzundin buyan amérika qoshma ishtatliri hökümiti shimaliy atlantik ehdi teshkilatini eyiblep kéliwatatti, muawin pirézidént pénsning shimaliy atlantik ehdi teshkilatining ehmiyitini yéngi keshp qilghandek qilidu. uzundin buyan amérika qoshma ishtatliri rehberliridin shimaliy atlantik ehdi teshkilatigha ziyan yetküzidighan bayanatlar kéliwatqan bir peytte, uning bundaq bayanatni bérishi, shimaliy atlantik ehdi teshkilatining ehmiyitini keshp qilishi jehettin tunji qétimliq ish boldi. türkiyening dawamliq shimaliy atlantik ehdi teshkilatigha ezaliqini talash – tartish qilish, eslide shimaliy atlantik ehdi teshkilatining asasliq qimmet ölchemlirini talash – tartish qilish dégenliktur.»
türkiyening shimaliy atlantik ehdi teshkilatining qurghuchusi bolushtin sirt yene, eng halqiliq we eng muhim ittipaqdashliridin biri ikenlikini tekitligen chelik, türkiyening ittipaqdashliq munasiwetliri mesiliside hemishe mesuliyetchanliq bilen zimmisige yüklengen wezipisini toluq ada qilip kéliwatqanliqini eskertip mundaq dédi: «türkiyening shimaliy atlantik ehdi teshkilati etrapidiki roligha nezer tashlighan haman, türkiyening musteqil bir dölet bolush süpiti bilen özining bixeterlikini eng küchlük shekilde qoghdawatqanliqini, shuning bilen bir waqitta, rayon hem dunyaning bixeterlikini qoghdashqa qanchilik derijide zor töhpilerni qoshuwatqanliqini, emma bashqilarning türkiyening bu tirishchanliqlirigha ziyan yetküzüshke urunuwatqanliqini körüwalghili bolidu, bundaq qilish toghra emestur.»
türkiyening rusiyedin «400 - s» bashqurulidighan bomba mudapie sistémisi sétiwélishini xalimaydighan amérika rehberlirige naraziliq bildürgen chelik, türkiyening ilgiri amérika qoshma ishtatliridin «wetenperwer» namliq bashqurulidighan bomba sétiwélishigha qarshi chiqqan bu rehberlerning, emdilikte türkiyedin alliqachan tüzülüp bolghan kélishimdin waz kéchishini telep qilishining, türkiyening igilik heq - hoquqlirigha hörmetsizlik qilghanliq bolidighanliqini qeyt qildi.
türkiyening bundaq hörmetsizlik aldida hergizmu tiz pükmeydighanliqini, hemde tégishlik jawab qayturidighanliqini éytqan chelik, mundaq dep körsetti: «hemmige munu heqiqetni ochuq - ashkara halda bildürüp qoyushni xalaymiz: hemme shimaliy atlantik ehdi teshkilatining intayin halqiliq we muhim döliti bolghan türkiyening teshkilat ichidiki ittipaqdashliq rolining qimmitini bilishi kérek, aldimizdiki mezgilde dunyaning weziyiti mana mushu ittipaqdashliqning téximu muhim rol oynishini teqezza qilidu, bu bolsa, türkiyening aldimizdiki mezgilde rayon hem dunyaning bixeterliki jehettin otturigha chiqqusi tehditlerge taqabil turush mesiliside téximu muhim rol oynaydighan halqiliq dölet ikenlikini körsitidu.»
