chawushoghlu: uyghurlargha dair doklatlar ademni qattiq endishige salidu

türkiye awazi radiyosi xewiri: chawushoghlu, birleshken döletler teshkilatining shiwéytsariyening jenwe shehiridiki ish béjirish ornida bashlanghan «kishilik hoquq kéngishining 40 – nöwetlik yighini» ning échilishidiki «aliy derijilik rehberler» bölümide kéngeshke xitab qildi.

türkiyening fethullahchi térrorluq teshkilati, p k k/p y d/ y p g we daésh qatarliq köpligen térrorluq teshkilatlirining tehditlirige qarshi birla waqitta  küresh qiliwatqan bolushigha qarimay, kishilik heq – hoquqlirigha hemishe nahayiti zor ehmiyet bérip kéliwatqanliqini tekitligen chawushoghlu, démokratiye we kishilik hoquqni qoghdashning daima eng muhim küntertipliri bolghanliqini qeyt qildi.

dunyaning oxshimighan rayonliridiki insaniy tiragédiyeler toghriliqmu toxtalghan chawushoghlu, uyghur aptonom rayonidiki uyghur türkliri we bashqa musulman guruppilargha qaritilghan kishilik hoquq depsendichiliklirige alaqidar doklatlarning endishilik ikenlikini tekitlep mundaq dédi: «birleshken döletler teshkilatining irqiy iyramchiliqni yoqitish komitéti we bashqa xelqaraliq teshkilatlarning uyghur türkliri we bashqa musulman guruppilargha qaritilghan kishilik hoquq depsendichiliklirige alaqidar doklatliri ademni qattiq endishige salidu. biz xitayning térrorizmgha qarshi  küresh hoquqi barliqini qobul qilimiz, shuning bilen bir waqitta, béyjing térrorchilar bilen mesum insanlarning arisini éniq ayrishi kérek, dep qaraymiz. xitay dairiliridin uyghur türkliri we bashqa musulman guruppilarning diniy erkinliklirinimu öz ichige alghan alemshumul insaniy we kishilik heq – hoquqlirigha hörmet qilishini kütüwatimiz.»