erdoghan: «amérika wedisige emel qilmisa, özimizning kindikini özimiz kisimiz»

türkiye awazi radiyosi xewiri: jumhur reis rejep tayyip erdoghan adalet we tereqqiyat partiyesi (AK Parti) ning türkiye büyük millet mejlisi (parlaménti) de ötküzülgen guruppa yighinida muhim söz qildi. u amérikaning kélishim boyiche térrorluq teshkilati y p g|p k k ni qollishini toxtitishqa we térroristlarning rayondin chiqirilishi heqqide bergen wedisini ada qilishqa chaqirdi.

u türkiyening süriyening zémin pütünlüki, siyasiy birlikige hörmet qilidighanliqini eskertip: «qanuniy salahiyiti bolghan süriye öktichiliri bilen körüshüp, ulargha yardemchi bolushqa tirishiwatimiz. bixeterlikimizni kapaletke ige qilishning birdinbir yoli süriyede térrorluq teshkilatlirining menbelirini qurutushtur» dédi.

türkiyening daésh we p k k|y p g gha, ular térrorluq teshkilatliri bolghanliqi üchün qarshi chiqqanliqini tekitlep: «firat deryasining sherqiy we munbich süriye küntertipimizning eng muhim témiliri hésablinidu. amérikaning bizge bergen wedisige emel qilishini ümid qilimiz. munbich mesilisi otturigha tashlap qoyulghanséri beshshar esed hökümitining rayongha bolghan hewisimu éship barmaqta. mezkur rayonning xelqi türkiyening qoghdishi astida özining kélechikige özi ige chiqishni xalaydu, bizge ishinidu. dölitimizdiki süriyelikler p k k|y p g ning rayon xelqige salghan zulumi seweblik yurt-makanlirigha qaytalmaywatidu. herbiy teyyarliqlirimizni dawamlashturimiz, amérika bizge bergen wedisige emel qilmisa, özimizning kindikini özimiz kisimiz» dédi.

amérika pirézidénti donald tramp bilen bu mesililer toghrisida kishini ümidlendüridighan we nahayiti ünümlük uchrishishlarni ötküzgenliklirini, biraq töwen sewiyelik uchrishishlarda oxshash ünümni qolgha keltürelmigenliklirini qeyt qildi. u mundaq dédi:

«hazirghiche aldimizgha qoyulgha konkrét pilan yoq. sewrimizning chéki bar. bir qanche hepte ichide térroristlar munbichtin chiqrilmisa, saqlash waqtimiz toshidu. özimizning pilanini emelge ashurush hoquqimiz peyda bolidu. pichaq söngekke yetkende qilidighan ishimiz toghriliq birsidin ruxset alidighan yaki birsige hésab béridighan mejburiyitimiz yoq. émbargo tizimliki qatarliq her qandaq tehdit bizni yolimizdin tosalmaydu. rayondiki hemme qebililer bizdin qachan kélisler dep sorawatidu. ular bilen körüshüwatqan mesullargha bu heqtiki yolyoruqlarni ochuq-ashkara berdim» dédi.