erdoghan bilen trampning söhbitide «bixeter rayon» mesilisi küntertipke kelgen
türkiye jumhur reisi rejep tayyip erdoghan süriyede tesis qilinishi mumkin bolghan «bixeter rayon» layiheside, bölgünchi térrorluq teshkilati p k k ning qolchumaqchisi y p g|p y d ning ornining yoqluqini bildürdi.
türkiye awazi radiyosi xewiri: jumhur reis rejep tayyip erdoghan adalet we tereqqiyat partiyesi (AK Parti) ning türkiye büyük millet mejlisi (parlaménti) guruppa yighinidin kéyin, muxbirlarning soallirigha jawab berdi. u tünügün (14-yanwar) amérika pirézidénti donald tramp bilen téléfonda körüshkende küntertipke kelgen süriyede «bixeter rayon» tesis qilish pikri üstide toxtaldi. u türkiyening bu pikirni sabiq pirézidént barak obama dewridila teklip qilghanliqini eskertip, mundaq dédi:
«amérika süriyede hawa kontrolluqini qoligha alsa, biz quruqluqta barliq bixeterlikni qolimizgha alalaymiz dégen iduq. obama bu mesilide tégishlik qedemlerni basmidi, obama buningda 30 kilométir kenglikte bolsa bolidu, dep qaraytti. menmu bu pikirge ijabiy qarighan idim. bu mesile üstide yene oylishishqa bolidu, hetta buni yene 20 mil kéngeytishkimu bolidu.»
u türkiyening kolléktip turalghu tereqqiyat idarisi (TOKİ) arqiliq buning höddisidin chiqalaydighanliqlirini bildürüp: «arqa septe maddiy jehettin yardem qilish wezipisi bizge bérilse, bixeter rayon mesilisini hel qilghan bolimiz. biraq, bixeter rayon térroristlargha tashlap bérilmeydu. y p g| p k k bundaq layihedin orun alalmaydu, chünki ular térrorist. xelqaraliq birleshme qisim bilen birlikte heriket qilinidu.»
u süriye mesilisi boyiche rusiye pirézidénti wladimir putin we iran pirézidénti hesen ruhani bilen üch terep yighini ötküzülidighanliqini bildürdi we mundaq dédi:
«rusiye ziyaritimning mushu ayning 23-küni emelge éshish mumkinchiliki chong.»
