erdoghan b d t omumiy kéngishide söz qildi
jumhur reis rejep tayyip erdoghan, amérika qoshma ishtatlirining nyu york shehiride chaqirilghan 73 – nöwetlik b d t omumiy kéngishi bashliqlar yighinida eza döletlerning lidirlirigha xitab qildi.

türkiye awazi radiyosi xewiri: jumhur reis rejep tayyip erdoghan, amérika qoshma ishtatlirining nyu york shehiride chaqirilghan 73 – nöwetlik b d t omumiy kéngishi bashliqlar yighinida eza döletlerning lidirlirigha xitab qildi؛ u, b d t qurulmisidiki yétersizliklerni bir – birlep otturigha qoydi we yene bir qétim «dunya 5 tin chongdur» déyish arqiliq wijdanlarning sadasi boldi.
b d t xewpsizlik kéngishi ret qilish hoquqigha ige 5 eza döletning menpeetlirige xizmet qilidighan, yüz bériwatqan zulumlarni tamasha qilip turidighan bir qurulmigha aylandi» dégen erdoghan, sözi jeryanida, amérika dairilirining ottura sherq siyasitini tenqidlep, «pelestinliklerge qilinghan zulumgha süküt qilghanlarning ulargha qilinghan yardemlerni toxtitip qoyushliri zalimlarning jasaritige jasaret qoshmaqta.» dédi.
erdoghan amérika qoshma ishtatlirini p k k térrorluq teshkilati toghrisida agahlandurup, «taktikiliq menpeetlerni dep (süriyediki) térrorchilargha on minglache yük aptomobili, milarche yük ayropilani qoral bergenler kélechekte buning azabini jezmen chékidu» dédi.
jumhur reis erdoghan, fethullahchi térrorluq teshkilati kattibéshini zéminlirida turghuzuwatqan amérikini «fethullahchi térrorluq teshkilatining, amérikining 27 wilayitide peqet chartér mektepler wasitisi bilen dölet xamchotidin alidighan yilliq puli 763 milyon dollardur» dégen sözliri arqiliq agahlandurdi we sözini dawamlashturup, «bu (fethullahchi térrorluq teshkilati) ning béshi nöwette amérika qoshma ishtatlirida,pénsilwaniyedidur. 400 moluq yerde yashimaqta, bu yerde turup dunyaning 160 dölitige térrorchi éksport qilmaqta» dégenlerni qeyt qildi.
erdoghan sözi jeryanida, yer yüzidiki adaletsizliklerni dunya lidirlirining küntertipige diqqetni jelp qilidighan misallar arqiliq kirgüzüp, «bügün dunyaning eng bay 62 kishisining mal – mülki, nopusning yérimigha yéqinigha yeni 3 milyard 600 milyongha insanning mal – mülkige toghra kelse, bu yerde bir mesile bar, démektur. perqliq rayonlarda 258 milyon adem bir qeder insaniy sharaitlarda hayat kechürüsh üchün yollargha chiqqan bolsa, 68 milyon adem mejburiy halda yer – makanliridin mehrum qiliniwatqan bolsa, bu yerde bir mesile démektur. afriqida tughulghan bir balining ölüp kétish éhtimali, bu sheher (nyu york) de tughulghan bir baligha qarighanda 9 hesse artuq bolsa, bu yerde bir mesile bar, démektur» dédi.
jumhur reis erdoghan sözide, türkiyening süriye kirizisigha chare tépish yolida körsetken tirishchanliqlirini bayan qilip ötti. u, türkiye armiyesining süriyening jerablus we rai rayonlirini daéshtin, afrin rayonini p k k / p y d – y p g térrorluq teshkilatidin tazilap, 4 ming kiwadrat kilométir jayni milyonlarche süriyelik üchün bixeter we xatirjem orungha aylandurghanliqini, türkiyening süriyelik musapirlar üchün bügüngiche 32 milyard dollar serp qilghanliqini eskertti we sözini dawamlashturup, «ehwal shundaqken, chet eldin alghan yardimimiz xelqara organlardin 600 milyon dollar, yawropa ittipaqidinmu hazirghiche emeliy tapshurulghini 1 milyard 700 milyon yawrodur» dédi.
b d t ni insaniyetning adalet ümidining bayanatchisi we ijra qilghuchisigha aylandurushqa chaqirghan jumhur reis erdoghan, barliq mesililerning ijabiy diyalog yoli arqiliq hel qilinishi terepdari ikenlikini éytti.
dunya soda tüzümining bir tereplime qararlar arqiliq buzulushining aldini élish üchün, hemme birlikte heriket qilish kéreklikini eskertken erdoghan, sözlirini yene bir chaqiriq bilen axirlashturdi: «türkiye bolush süpitimiz bilen, b d t yashlar qurulushining baldurraq tesis qilinishini, merkizining istanbul bolushini teklip qilimiz.»
مۇناسىۋەتلىك خەۋەرلەر

erdoghan: israiliye ishghaliyitini axirlashturup, keltürüp chiqarghan ziyanlarni tölep bérishi kérek

erdoghan malayshiyagha yürüp ketti
jumhur reis rejep tayyip erdoghan malayshiyada dölet ishliri ziyaritide bolidu.