erdoghan: yawropa elliri démokratiye mesiliside qosh ölchemlik siyasetni yolgha qoyuwatidu
jumhur reis rejep tayyip erdoghan yawropa ellirining démokratiye mesiliside türkiyege qarita qosh ölchemlik siyasetni yolgha qoyuwatqanliqini éytti.
türkiye awazi radiyosi xewiri: jumhur reis erdoghan xusuiy bir téléwiziye qanilining neq meydandin ortaq tarqitish pirogrammisida bu heqte toxtalghanda mundaq dédi: «nöwette biz yawropa ittipaqigha eza bolush yolida zimmimizge yüklengen wezipilerning hemmisini toluq ada qiliwatimiz, biraq, yawropa ittipaqi özining zimmisige yüklengen wezipisini ada qilmaywatidu. biz yaxshi niyet bilen dawamliq algha qedem tashlawatimiz, buningdin kéyinmu shundaq qilimiz. eger yawropa ellirining türkiyege qarita niyiti xalis bolsa, undaqta buni namayen qilishi hem saqliniwatqan mesililerni hel qilishi lazim. eksiche bolghanda, biz bu mesililerni özimiz hel qilimiz. mesililerni hel qilish üchün yawropa ittipaqigha eza bolushtin bashqa chare yoq deydighan gep yoq.»
qoralliq uchquchisiz hawa apparati ishlepchiqirishta dunya boyiche aldinqi qatarda turidighan 6 dölettin birining türkiye ikenlikini eskertken erdoghan, türkiyening nöwette milliy eqilliq bombilarni ishlepchiqiralaydighan sewiyege yetkenlikini tekitlidi.
jumhur reis erdoghan türkiyening érrorizmgha qarshi küresh dairiside chégra halqighan herbiy heriketlerni élip bérish pilanining bar - yoqluqigha alaqidar soalgha jawab bergende mundaq dédi: «zörür tépilghanda chégra atlap herbiy heriket élip barimiz, chünki térrorchilarning dölitimizge xiris qilishini qilche kechürmeymiz, bu heqte bashqilardinmu ijazet sorimaymiz, meyli süriye teripidin bolsun, meyli shimaliy iraq teripidin bolsun, dölitimizning tehditke duch kélishige esla sewr - taqet qilalmaymiz hem yol qoyalmaymiz.»
jumhur reis rejep tayyip erdoghan yerlik aptomobil ishlepchiqiridighan birleshme shirketning éniq bolghanliqini tekitlep mundaq dédi: «biz 2021 – yiligha barghanda tok we eqilliq aptomobil ishlepchiqirimiz. men bu heqte 5 ezimetning meydangha chüshishini telep qilghanidim, dégendek nurghun ezimetler otturigha chiqip, özlirining bu heqtiki jasariti hem iqtidarini namayen qildi, jümlidin aptomobil ishlepchiqirish guruhini shekillendürdi, bu guruhqa bos guruhi shirkitidin mehmet gürjan qaradash isimlik bir dostimizni mesul qilduq, xudayim buyrisa, bu dostimiz bilen birlikte bu pilanni muweppeqiyetlik halda ijra qilimiz.»
