erdoghan: bezi döletler qosh ölchemlik pozitsiyedin waz kéchishi kérek

türkiye awazi radiyosi xewiri: jumhur reis we adalet we tereqqiyat partiyesi rehbiri rejep tayyip erdoghan partiyesining bash merkizide bérilgen eneniwi bash elchiler iptar ziyapitide qilghan sözide, türkiyening térrorluq teshkilatlirigha qarshi izchil küresh qiliwatqanliqini, buning nahayiti zor ehmiyetke ige ikenlikini eskertish bilen bir waqitta,  bezi döletlerning térrorizmgha qarshi  küreshke qosh ölchemlik pozitsiye tutushtin waz kéchishi lazimliqini tekitlep mundaq dédi: «bölgünchi térrorluq teshkilati p k k we uning süriyediki gumashtisi p y d/y p g, daésh we elqaide  hemde eng muhimi yéngi ewlad shalghut térrorluq teshkilati bolghan fethullahchi térrorluq teshkilatigha qarshi izchil  küresh qiliwatimiz. biraq, bezi döletlerning térrorizmgha qarshi  küresh mesilisige qosh ölchemlik pozitsiye tutuwatqanliqinimu epsuslanghan halda éytishqa mejburmen. eng yaxshisi, bu döletler  térrorizmgha qarshi  küreshke qosh ölchemlik pozitsiye tutushtin waz kéchishliri lazim.»

térrorluq teshkilati daéshqa kelgende görkirep awazi chiqidighan bezi küchlerning, p k k we uning gumashtiliri bilen fethullahchi térrorluq teshkilatigha kelgende süküt qilidighanliqi we jimip kétidighanliqini eskertken jumhur reis erdoghan mundaq dep körsetti: «hetta bezi döletlerning p y d/y p g mesiliside tutuwatqan pozitsiyeliri bu térrorluq teshkilatining xelqqe téximu köp zulum sélishi we bésim ishlitishini qollash pozitsiyelirige aylinip kétidu. buningdin bashqa yene, térrorluq teshkilati p k k ning latiliri uzun yillardin buyan gherb elliride erkin – azade halda ishlitiliwatidu,  oxshashla bash térrorchining resimishi chüshürülgen latilarmu cheklimisiz halda ishlitiliwatidu, térrorluq teshkilati bésim ishlitish we tehdit sélish arqiliq pul yighish qiliwatidu. térrorchilar gherb döletlerning paytextliridiki eng awat merkiziy meydanlarda erkin – azade halda   térrorluq teshwiqatlirini élip bériwatidu. bundaq ishlar fethullahchi térrorluq teshkilati unsurliri üchünmu küchke ige.»

yawropadiki köpligen döletlerning qolliri mesum kishilerning qéni bilen boyalghan qatillar üchün adalettin qéchip panahlinidighan bixeter portlargha aylinip qalghanliqini qeyt qilghan jumhur reis erdoghan mundaq dédi: «héchkim eyibke buyrumisun, térrorluq teshkilatlirigha qarshi  küreshte bundaq ikki yüzlimichilik qilghanda, héchqanche ilgirilesh hasil qilghili bolmaydu. aldi bilen, térrorchigha térrorchi déyish, andin térrorchilagha qarshi birlikte  küresh qilish shert. bundaq wehimilik menzire aldida, türkiye öz istiqbaligha xiris qiliwatqan tehditlerni üzül - késil bir terep qilish üchün özige xas tedbirlerni almaqta.»