«türkiye insaniyetning shan – sheripini qoghdash yolida  küresh qiliwatidu»

bash ministir binali yildirim türkiyening süriye we iraqning bezi rayonlirida élip bériwatqan kürishining, insaniyetning shan – sheripini qoghdash nishan qilinghan  küresh ikenlikini éytti.

940769
«türkiye insaniyetning shan – sheripini qoghdash yolida  küresh qiliwatidu»

türkiye awazi radiyosi xewiri:  yildirim dölet ishliri ziyaritide bolush üchün yétip barghan bosniye – gértségowinada, ministirlar kéngishining mesuli dénis zwizdich bilen birlikte bosniye – gértségowinaning paytexti sarayiwoda türk soda - sanaetchiler teripidin échilghan xelqara sarayiwo uniwérsitétini ziyaret qildi hemde bu yerde oqughuchilargha xitab qildi.

xelqara sarayiwo uniwérsitétigha 2013 – yili 8 – öktebir küni uniwérsitét qurulghanliqining 10 – yilliqini tebriklesh munasiwiti bilen ötküzülgen murasimgha qatnishish üchün kelgenlikini eskertken  yildirim, mundaq dep körsetti: «<ataqliq alim, büyük mutepekkur we dölet erbabi> dep atalghan bosniye – gértségowinaning qurghuchi rehbiri eli izzetbégowichni cheksiz iptixarliq we chongqur séghinishliq ilkide menggü yad étimiz. derweqe, izzetbégowich tesewwur dunyamizni mislisiz derijide béyitqan qutub yultuzliridin biri idi, yatqan yéri jennet bolghay !»

pütkül balqan rayoni üchün huzur, tinchliq we ésenlik tiligen  yildirim, «türkiye bosniye – gértségowinaning hem yawropa ittipaqigha ezaliqini hem shimaliy atlantik ehdi teshkilatigha ezaliqini qollimaqta hemde her jehettin hesse qoshmaqta» dédi.

 yildirim yéqinqi künlerde küntertipke kelgen, «türkiye yönilishini yawropa ittipaqidin bashqa terep özgertiwatidu» teriqisidiki tenqidlerning asassiz, bir tereplik we bimene ikenlikini tekitlep mundaq dédi: «jumhur reisimiz erdoghan aliylirimu yawropa ittipaqi – türkiye munasiwetlirini tereqqiy qildurush yolida dawamliq tirishchanliq körsitiwatidu, bu heqte ishliniwatqan xizmetlerge rehberlik qiliwatidu. bizning gherbke ehmiyet bérishimiz, köngül bölüshimiz, munasiwet ornitishimiz melum ölchemlerge asaslinidu, tashqi siyasitimizning asasliq nishanimu hemmige ayan.  türkiye elwette yawropa ittipaqigha eza bolushni xalaydu, biraq qandaq bolushidin qetiynezer we qandaq bedel töleshtin qetiynezer eza bolush niyiti yoq. bizning nishanimiz, yawropa ittipaqigha musulman kimlikimizni, milliy qimmet ölchemlirimizni saqlap qalghan asasta eza bolushtin ibaret. eger ular bizge: < buningdin waz kéching> dése, u chaghda, bundaq bir yawropa ittipaqining bizge nisbeten qilche ehmiyiti hem paydisi yoqtur. derweqe, kimlikimizni, milliy qimmet ölchemlirimizni qoghdash démek, kélechikimizni kapalet astigha élish démektur. undaq bolmighanda, mustemlike éngining bir parchisigha aylinip qalimiz. eng muhimi, insanlarning qimmet ölchemlirini, kimliklirini qoghdishi, saqlap qélishi, assimilyatsiye bolup ketmestin, özlirining mewjudiyitini menggü dawamlashturalishidur, bizning étiqadimizmu, qimmet ölchemlirimizmu buni teqezza qilidu, elwette.»

 bosniye – gértségowinaning bügünning we etining dunyasi üchün muhim bir jughrapiye ikenlikini eskertken  yildirim, bosniye – gértségowinaning özgichilik, her xilliq, rengdarliq, türlük alahidiliklerni baghrigha bésiwatqan eng yaxshi ülge ikenlikini qeyt qildi.

yawropada irqchiliq, islam düshmenlikining barghanséri ewj élip kétiwatqanliqini eskertken  yildirim, mundaq dédi: «bundaq bir yawropaning kélechikining parlaq bolushi mumkinmu? bundaq kétiwerse nishanigha yételemdu? shunga biz dostlirimizgha mundaq tewsiyelerde boluwatimiz: biz toghruluq, türkiye toghruluq analiz élip barghininglarda, etrapimizdiki bölgünchi fethullahchi térrorluq teshkilati unsurlirining tetür teshwiqatlirigha asasen, ularning bimene qarashlirigha asasen analiz élip barmanglar, heqiqetlerni biwasite sürüshtürünglar, tetqiq qilinglar, tekshürünglar, axirida toghra yekün chiqiringlar. eger jughrapiye, din we étnik jehettin bir - birige oxshimaydighan alahidiliklerni baghrigha bésip, özgiche medeniyet berpa qilghan bir jay lazim bolsa, bu jay del bosniye – gértségowinadur.»

yéqindin buyan türkiye – yawropa ittipaqi otturisida otturigha chiqiwatqan mesililerning sewebining,  türkiyening bu jughrapiyede, ezasi bolghan shimaliy atlantik ehdi teshkilatining chégralirini qoghdash üchün hayat – mamatliq  küresh qilishi ikenlikini tekitlep mundaq dédi: «türkiyening afrin rayonida élip bériwatqan kürishimu, <firat qalqini> namliq herbiy heriket rayonida élip bériwatqan kürishimu, shimaliy iraqta dawamlashturuwatqan kürishimu insaniyetning shan – sheripini qoghdash nishan qilinghan  küreshtur. bu nuqtidin élip éytqanda, türkiye heqqide térrorluq teshkilatlirining, fethullahchi térrorluq teshkilati unsurlirining, bölgünchi térrorluq teshkilati p k k térrorchilirining tetür teshwiqatlirigha asasen, ularning sepsetilirige aldanghan halda yekün chiqirish yawropa ittipaqigha yarashmaydu, dosluqqimu yarashmaydu, ittipaqdashliqqimu yarashmaydu.»

bash ministir binali yildirim bosniye – gértségowina pirézidéntliq kéngishining reisi baqir izzetbégowich bilenmu bir yerge jem boldi.



مۇناسىۋەتلىك خەۋەرلەر