türkiye idlibtiki ximiyelik hujumni eyiblep, tekshürülüshini telep qildi

türkiye awazi radiyosi xewiri: türkiye tashqi ishlar ministirliqi idlibtiki ximiyelik hujumni eyiblep bayanat élan qildi. bayanatta mundaq déyildi:

«beshshar esed hakimiyitining süriyening idlib wilayitige qarashliq xan sheyxun rayonigha qilghan we köpinchisi kichik balilarni öz ichige alghan bigunah kishiler hayatidin ayrilghan hujumni qattiq eyibleymiz.»

bayanatta, xan sheyxundin élinghan körünüshler we melumatlarning beshshar esed hakimiyitining b d t xewpsizlik kéngishining 2118- we 2209-nomurluq qararlirigha ochuqtin ochuq xilapliq hésablinidighan ximiyelik qoral ishlitishni dawamlashturuwatqanliqi tekitlendi.

bayanatta yene mundaq déyildi:

«xelqaraliq jemiyetlerning bu hujum qarshisida naraziliqini bildürüshini, ximiyelik qorallarni cheklesh teshkilati qatarliq xelqaraliq jemiyetlerning téxi yüz berginige uzun bolmighan buninggha oxshaydighan hujumlar üstide derhal tekshürüsh bashlishini kütimiz. beshshar esed hakimiyitige nisbeten tesir küchi bar tereplerni urush toxtitish kélishimige éghir xilapliq qilghan we pütünley bigunah puqralargha qaritilghan hujumlarning derhal toxtishini kapaletke ige qilidighan mesuliyitini ada qilishqa chaqirimiz.»

türkiye jumhur reislik mehkimisining bayanatchisi ibrahim kalinmu idlibtiki ximiyelik qoral hujumining urush jinayiti we insaniyetke xilap jinayet dairiside bir terep qilinishi kéreklikini bildürdi.

ibrahim kalin hujumni qattiq eyibleydighanliqlirini eskertip, adetke aylinip qalghan bu hujumlarning, türkiyening süriye kirizisigha nisbeten bashtin tartip tutup kelgen pozitsiyesining qanchilik toghra ikenlikini nahayiti éniq körsitip bergenlikini qeyt qildi.

yawropa ittipaqi ishliri ministiri we bash muzakirechi ömer chelik twittérda: «süriyede peqet ademlerla emes, belki adimiylikmu qetl qiliniwatidu. qirghinchiliqning toxtitilishi üchün yene qanche süriyelik kichik bala ölüshi kérek?» dédi.

idlibtiki ximiyelik qoral hujumining tesirige uchrighan we dawalinsh üchün türkiyege élip kélingen kishilerning sani 32 ge yetti. ehwali éghir bolghan ikki kishining qutquzush ünüm bermey hayatidin ayrilghanliqi bildürüldi.

bildürülishiche, jilwegözü chégra éghizigha élip kélingen süriyelik yaridarlar alahide forma kiygen sehiye xadimlirining deslepki salametlik tekshürüshidin kéyin chégradin kirgüzülgen.