chelik: gérmaniye türkiye bilen özi arisigha «bérlin témi» soqmaqta

türkiye awazi radiyosi xewiri: anadolu agéntliqining tehrirler üstili pirogrammisigha qatnashqan ömer chelik, türk ministirlarning gérmaniyede qatnishidighan yighinlirining emeldin qaldurulushigha naraziliq bildürdi we yüz bergen yighini kirizisigha «shübhisizki bu, éghir bir kirizistur» dep baha berdi.

yighinlarning échilishigha tosqunluq qilish qilmishlirigha mehelliy dairilerning emes, hökümetning jawabkar ikenlikini eskertken chelik, «sistémiliq bir tosqunluq qilish bar... türkiye bilen özi arisigha bir bérlin témi séliwatidu. biraq bu, bu yerde qalmaydu» dédi.

ömer chelik, türkiyening yawropa ittipaqigha eza bolush musapisi toghrisida toxtilip, özidin pat – pat «türkiye hélihem yawropa ittipaqigha eza bolushni xalamdu?» dégen soallarning sorilidighanliqini eskertken halda, «<türkiye yawropa ittipaqigha eza bolushni xalamdu?> dégen jümlidiki <yawropa> dégen söz muhim. qaysi yawropa? eger közde tutuwatqiningiz (sabiq firansiye pirézidénti nikola) sarkoziyning, (ashqun ongchi partiye milliy firontning lidiri marina) lé pénning, (ashqun ongchi erkinlikler partiyesi rehbiri grét) wildérsning zéhnidiki yawropa bolsa, türkiye héchqachan bundaq bir yawropaning ichide bolushni xalimaydu, bundaq bir yawropani qanunluq, depmu qarimaydu. biraq, siyasiy qimmet – qarashlar bilen bir gewdileshken, kishilik hoquq we démokratiye toghrisidiki qosh ölchemlerdin xaliylashqan, yawropaning qurghuchi zatliri otturigha qoyghan dairide tinchliq we muqimliq layihesi bolghan yawropani közde tutuwatqan bolsingiz, türkiye buning tebiiy bir parchisi bolushni arzu qilmaqta» dédi.