erdoghan engliye bash wezirini qobul qildi
jumhur reis rejep tayyip erdoghan, suriye we iraq mesilisining engliye bilen türkiye üchün muhim orunda turidighanliqini bildürdi.
türkiye awazi radiyosi xewiri: jumhur reis erdoghan dölet ishliri ziyariti munasiwiti bilen enqerege kelgen engliye bash weziri térésa meyni jumhur reislik sariyida qobul qildi؛ uchrishishtin kéyin erdoghan bilen méhman bash wezir qoshma muxbirlarni kütüwélish yighini ötküzdi.
engliye bilen türkiye arisidiki 15 milyard dollarliq soda hejimi toghrisida toxtalghan jumhur reis erdoghan, «15 milyard boluwatqan soda hejmimizni deslepki qedemde 20 milyard dollargha yetküzüshni pilanlawatimiz. istratégiyelik shérikchilik yolida tashlighan qedemlirimizni her ikki dölet arisida aqsitip qoymastin dawamlashturush boyiche meyli ministirlar meyli bash ministirlar derijiside bolsun, kélishtuq» dédi.
engliye bash weziri mey bilen qibris, süriye , iraq we astane musapisi toghrisida pikir almashturghanliqini eskertken jumhur reis erdoghan sözini dawamlashturup mundaq dédi: «rayondiki süriye we iraq mesilisi türkiye – engliye arisida muhim ehmiyetke ige. birleshme küchler bilen türkiyening hemkarliqini buningdin kéyinki basquchta téximu perqliq liniyege kirgüzüshni xalaymiz. bu mesililerni özara muzakire qilduq.»
engliye bash weziri térésa meymu jumhur reis erdoghan bilen qibris, süriye , soda we mudapie saheliride hemkarliq ornitish mesililiri boyiche sözleshkenlikini eskertti. türkiyening 15 – iyulda démokratiyesige ige chiqqanliqini qeyt qilghan engliye bash weziri térésa mey, «munasiwetlirimizni téximu yuqiri kötürüsh ikki dölet üchün paydiliqtur» dédi.
uchrishishta qibris mesilisiningmu küntertipke kelgenlikini tilgha alghan engliye bash weziri térésa mey, qibristiki muzakire musapisige ehmiyet béridighanliqini sözlirige ilawe qildi.
