türkiye bash ishtab bashliqi: ölsek shéhit, qalsaq ghazi éngi bilen heriket qilimiz

türkiye awazi radiyosi xewiri: bash qomandanliq ishtabi bashliqi général – polkownik hulusi akar we hemraliqidiki qomandanlar ichki ishlar ministirliqigha bérip, ministir efkan alagha xain herbiy - siyasiy özgirish qozghashqa urunush herikiti yüz bergen 15 – iyulda hayatidin ayrilghanlar üchün teziye bildürdi. u, «bundaq guruhlar, térrorchilar héchqachan bu dölette üstünlükke ige bolalmaydu, bu döletning yönilishini özgertelmeydu, ilgirilishini tosup qalalmaydu, lékin ziyan yetküzeleydu, lenet bolsun» dégenlerni qeyt qildi.

ministir ala, bash qomandanliq ishtabi bashliqi général – polkownik hulusi akar we armiye qomandanliri arqidin enqere saqchi teshkilati bash idarisigha bérip, binaning térrorchilar teripidin bombardiman qilinghan qismini közdin kechürdi we saqchilar bilen eskerlerning ikkinchi qarimu qarshi halgha kelmeydighanliqini tekitlidi. général – polkownik akar saqchilargha xitab qilip, «birlikte ter töktuq, birlikte qan töktuq. dölitimizning birlik we pütünlüki üchün mürini mürige tirep küresh qilimiz» dédi.

heyet arqidin térrorluq hujumida eng köp adem shéhit bolghan alahide heriket bashqarmisigha bardi. ichki ishlar ministiri efkan ala u yerni közdin kechürüsh jeryanida söz qilip, bu peskeshlerche qilinghan herbiy - siyasiy özgirish qozghashqa urunush qilmishini sadir qilghuchilarning weten ewladi emeslikini eskertti. bash qomandanliq ishtabi bashliqi hulusi akarmu, «türkiye armiyesige bu peskeshlikni qilghanlarni türkiye armiyesining mensupi dégili bolmaydu. bular yilanlar, chayanlar, térrorchilardur» dédi.

arqidin türkiye büyük millet mejlisi bashliqi ismail qahraman teripidin qobul qilinghan général – polkownik hulusi akar we hemraliqidiki qomandanlar bügün jumhur reis rejep tayyip erdoghan bilenmu körüshidu.