türkiye qoshniliri bilen munasiwetlirini tereqqiy qilduridu

türkiye awazi radiyosi xewiri: bash ministir binali yildirim türkiyening qoshniliri bilen bolghan munasiwetlirini tereqqiy qilduridighanliqini eskertip: «dostluq munasiwetlirimizni kücheytip, düshmenliklirimizni azaytimiz» dédi. u adalet we tereqqiyat partiyesi enqere wilayetlik shöbisidiki siyaset akadémiyesining telim – terbiye pirogrammisigha qatnashti we muhim söz qildi. u dunyada türkiye bayriqi lepildimigen jayning yoqluqini eskertip, türkiyening barliq döletlerni dost süpitide köridighanliqini, buningdin kéyinmu qara déngiz we aqdéngiz etrapidiki döletler bilen dostluq munasiwetlirini ilgiri süridighanliqini, ixtilaplarni eng töwen sewiyege chüshüridighanliqini bildürdi. u mundaq dédi:

«rayonimizda we dunyada tinchliqning omumlishishi üchün paal gheyret qilimiz, qoshnilirimiz bilen munasiwetlirimizni téximutereqqiy qildurimiz. iraq, süriye we misir qatarliq rayondiki barliq döletler bilen ghowgha qilidighangha yaki munasiwetlirimizni buzidighangha héchqandaq seweb yoq, belki munasiwetlirimizning ilgiri sürülüshi üchün nurghun sewebler bar.»

bash ministir binali yildirim térrorluq weqeliri we térrorluqqa qarshi küresh üstidimu toxtaldi. u mundaq dédi:

«térrorluqni türkiyening chégraliri ichide kontrol astigha élishimiz, küntertipning eng töwen ritige chüshürüshimiz, birinchi bolup ehmiyet béridighan ishlirimizdur. héchkim bizge nesihet qilishqa, héchkim bizdin bu herbiy heriketler némishqa tügimeydu, dep soal sorashqa urunmisun. bu herbiy heriketler tügimeydu. térrorluq teshkilati bigunah puqralarni öltürüshni dawamlashtursa, esker – saqchilirimizgha hujum qilip, shéhit qilishni toxtatmisa, jemiyette qorqunch peyda qilip, xelq ammisining turmushini zeherge aylandurushni dawam qilsa, puqralirimiz dölitimizning her bir bulung – puchqaqlirida xatirjem sayahet qilalmisa, elwette bu herbiy heriketler qetiy dawam qilidu.»