erdoghan boks shahining méyt namizigha qatnishish üchün amérikigha yürüp ketti

türkiye awazi radiyosi xewiri: erdoghan amérikigha seper qilish harpisida enqerediki esenbogha ayrodurumida bergen bayanatida, muhemmed elining boks meydanlirida qanchilik dangliq bolsa, insanlarning qeblliridimu shunchilik meshhur ikenlikini tekitlep mundaq dédi: «uning her bir sözi, her bir mushti, her bir ghelibisi afriqidin tartip asiyaghiche milyardche mezlumlargha ümid béghishlidi, küch – quwwet ata qildi. u iriqchiliq we ayrimchiliqqa qarshi harmay – talmay küresh qildi. uning: ‹allah taaladin bayliq telep qilghanidim, allahqa shükürler bolsunki, u manga islamni éhsan qildi› dégen sözi nahayiti zor ehmiyetke ige. uning musulman bolghandin kéyinki ülgilik ish – izliri nurghunlighan kishilerning musulman bolushida türtkilik rol oynidi. bolupmu 11 – séntebir weqesidin kéyin, ot öchürüsh xadimlirining kiyimini kiyip: ‹islam dini hergizmu qatillarning dini emes, islam démek, tinchliq démektur› déyish arqiliq namayen qilghan aliyjanab rohi menggü untulmaydu. uning mislisiz muweppeqiyetlirining perde arqisida pütkül insaniyet dunyasigha ilham menbesi bolghan étqadiy küchi, tewrenmes iradisi we igilmes - sunmas rohi yatidu. u musulman bolghandin kéyin türkiyede ziyarette bolghanidi. türkiye rehbiri bolush süpitim bilen méyt namizigha qatnishish arqiliq hem heyitimiz bilen birlikte uni axiretke uzitip qoyimiz hem kéchikip qalghan bolsaqmu, ziyaritige inkas qayturghan bolimiz. uning hayati, ülgilik ish – izliri, mislisiz kürishi bizning menggülük ilham menmeyimiz bolidu. xudayim buyrisa, wapatidin kéyin otturigha chiqqan boshluqni uning xatirisi we mirasigha sahib chiqish arqiliq choqum toldurimiz. ziyaret munasiwiti bilen méyt namizigha ishtirak qilidighan dunya rehberliri bilen ayrim - ayrim körüshimen, buningdin bashqa yene, yéqin ötmüshte amérikigha köchken  shikago rayonigha orunlashturulghan ahiska türkliri we rayon musulmanliri bilen birlikte iptarda bir yerge jem bolimen.»