65 – hökümetning pirogrammisi élan qilindi
adalet we tereqqiyat partiyesi rehbiri we bash ministir binali yildirim 65 – hökümetning pirogrammisini tünügün türkiye büyük millet mejlisi omumiy kéngishige sundi.
türkiye awazi radiyosi xewiri: hökümet pirogrammisining eng muhim küntertip maddiliridin biri térrorizmgha qarshi küresh we yéngi asasiy qanun idi.
bash ministir yildirim bölgünchi térrorluq teshkilati p k k we parallél térrorluq teshkilatini öz ichige alghan barliq térrorluq teshkilatlirigha qarshi küreshning qetiy dawamlishidighanliqini tekitlep mundaq dédi: «xelqimizning birliki, qérindashliqi we dölitimizning mewjudiyitige xiris qilidighan herqandaq qanunsiz heriketke qetiy yol qoyulmaydu. xelqimiz shuninggha ishinishi kérekki, térror balasi türkiyening küntertipidin choqum chiqirilidu.»
jumhuriyet 100 – yiligha qedem qoyghan bügünki künde adalet tüzülmisi we iqtisad qurulmisida élip bérilghusi keng kölemlik islahatlarning türkiyeni turmush sewiyesi yuqiri we xelqining ang sewiyesi yüksek döletke aylanduridighanliqini eskertken yildirim, «hökümitimiz xelqimizning parlaq kélechiki üchün aldinqi hökümetler mangghan daghdam yolda dawamliq mangidu. ‹döletning yashishi üchün insanni yashatqin› shoarini chiqish nuqta qilip, hemme ishta aldi bilen xelqimizning bext – saaditi we parawanliqini aldinqi pilanda tutimiz» dédi.
her millet xelqining étiqadi, tili, medeniyiti, qimmet ölchemliri, yashash terzi we bashqa oxshimaydighan tereplirige dawamliq hörmet qilidighanliqlirini tekitligen bash ministir insaniy tereqqiyatni chiqish nuqta qilip, heq – hoquq we erkinliklerning dairisini kéngeytishni dawamlashturidighanliqlirini qeyt qildi, türkiyeni qudretlik qanun dölitige aylandurush yolida muhim qedemlerning tashlanghanliqini eskertti, siyaset dairisining kéngiyidighanliqini, tewsiyelik dölet tüzümining ornigha xelqning iradisige toluq wekillik qilidighan tüzüm ornitilidighanliqini, yéngi asasiy qanun, yéngi dölet tüzülmisi, yéngi parlamént tüzümining ornitilidighanliqini, siyasiy partiyeler qanuni bilen saylam qanunining qaytidin tüzülidighanliqini, yéngi asasiy qanun we pirézidéntliq tüzümi qatarliq xizmetlerning adalet we tereqqiyat partiyesining eng muhim küntertip maddiliridin biri ikenlikini tekitlep mundaq dédi: «adalet we tereqqiyat partiyesining pirézidéntliq tüzümi teklipi milliy merkezchilik tüzümini asas qilidu. kélechekning asasini yashlar teshkil qilidu. shunga 65 – hökümetning eng muhim nishanliridin biri parlamént ezaliqigha saylinish yéshini 18 yashqa chüshürüshtur. jümlidin bu nishanlardin biri yéngi dewrde téximu köp ishsizlarni ishqa orunlashturush bolup, buning yoli bolsa meblegh sélish qurulushini téz sürette téximu rawajlashturushtin ötidu. shunga sherqiy we sherqiy jenubiy anadoluni öz ichige alghan dölitimizning sélinma ishliri tereqqiy qilmighan rayonlirigha dölet we xususiy karxanilar meblegh salidu, shuning bilen, ishsizlarni ishqa orunlashturush pilani ishqa ashidu. eng muhimi yashlirimizning térrorning torigha chüshüp qélishining aldi élinidu.»
